Krasniqi: Edhe kursimet e fëmijëve i kam investuar në kriptovaluta

Kryetari i Partisë Demokratike të Kosovës, Memli Krasniqi ka deklaruar se edhe kursimet e fëmijëve të tij i ka investuar në kriptovaluta.

Ai tha se nuk i rekomandon askujt që të veprojë ashtu siç ka vepruar ai me investime në kriptovaluta, por tha se investimin e ka nisur në vitin 2016 dhe është penduar që nuk ka investuar më herët.

“Ka kriptovaluta që ka rritje kur tjerat kanë rënie, ose e kundërta. Po, unë kam besim që kjo është e ardhmja. Unë nuk i rekomandoj askujt asgjë, krejt çka po flas për kripto nuk është rekomandim financiar, nuk është këshillë financiare”, tha Krasniqi.

Ai shtoi se, “nuk i rekomandoj askujt me investu më shumë sesa, aq sa mund t’i humbë krejt edhe që mundet me jetu pa to”.

“Nuk i rekomandoj askujt me bo, cka kam bo unë. Unë kam pas sukses por kam mundur edhe të dështoj shumë. Qaq besoj në këtë punë sa edhe kursimet e fëmijëve të mi, para dy vitesh i kamë kthyer në kriptovaluta”, u shpreh Krasniqi në Klan Kosova.

Ndryshe, Krasniqi në deklarimin vjetor në Agjencinë Kundër Korrupsionit (AKK),  posedon kriptovalut në vlerë mbi 300 mijë euro.

Krasniqi ka deklaruar investime në 35 kriptovaluta të ndryshme.

Lexo po ashtu Deklarimi i pasurisë: Deputeti i PDK-së Memli Krasniqi, mbi 300 mijë euro në kriptovaluta

Sipas përllogaritjeve në bazë të kohës së deklarimit të pasurisë nga Krasniqi, shuma e përkthyer në euro e investimeve të Krasniqit në kriptovaluta kap shumën e mbi 300 mijë eurove.

Ndërkaq, në deklarimin e pasurisë të 3 viteve më parë ai kishte vetëm 31 mijë euro.