Kontestet pronësore peng i asfaltimit të rrugës kryesore në Pojatë të Ferizajt

Prej më shumë se tre vjet rreth 400 familje mbesin pa asfalt shkaku i kontesteve pronësore në fshatin Pojatë të Ferizajt. Banorët po vazhdojnë të përballen me degradim të rrugës kryesore “Nazmi Selmani”, që sipas tyre po ua vështirëson qarkullimin dhe jetesën.

Tre vjet më parë disa qytetar kishin penguar punimet shkaku i këtyre kontesteve pronësore, ndërkohë  komuna nuk kishte arritur ta bën një zgjidhje për asfaltimin e saj, ani pse ishte e planifikuar në listën e projekteve kapitale.

Ndërkohë disa vjet më vonë pas zgjidhjes së kontestit brenda banorëve të këtij lokaliteti, komuna nuk ka gjetur mundësi financiare për ta vazhduar projektin. Kjo rrugë lidhë edhe segmentin tjetër në drejtim të fshatit Mirosalë, andaj sipas banorëve asfaltimi i rrugës së tyre është i doemosdoshëm.

Në komunën e Ferizajt kanë thënë se projekti do të realizohet gjatë vitit të ardhshëm nëse kontestet brenda banorëve janë zgjidhur.

Banorët kanë thënë se kërkesat e tyre nuk janë shqyrtuar deri më tash nga drejtoria e infrastrukturës në Komunën e Ferizajt, ani pse disa herë kanë marrë premtime se rruga do të asfaltohet.

Ibrahim Latifi, përfaqësues i fshatit Pojatë, ka thënë se shpeshherë mbajnë mbledhje me këshillin e fshatit dhe debatojnë për gjendjen e rrugëve me gropa, mirëpo kërkesat e tyre nuk po shqyrtohen nga organet komunale.

Latifi ka sqaruar se në fillim ka pasur disa pengesa nga banorët shkaku i kontesteve pronësore, por me kalimin e kohës janë zgjidhur, por projekti nuk ka vazhduar.

“Kjo rrugë ka qenë në projekt të komunës para 3 vjetëve, por nuk është realizu. Është dashtë që deri tash të përfundon si projekt sepse po përballemi për çdo ditë me këtë problem. Degradimi i rrugës po shkakton edhe defekte nëpër vetura, ndërkaq telashe në qarkullim më së shumti po kanë fëmijët derisa po shkojnë në shkollë. Gjendja është rënduar edhe më shumë gjatë këtyre ditëve kur filluan të reshurat e borës dhe shiut. Kërkojmë edhe një herë nga komuna të asfaltohet rruga  sepse nuk është më e gjatë se 350 metra dhe jetojmë rreth 400 familje”, ka kërkuar Latifi.

Në anën tjetër Meriton Hajdini, drejtor për Infrastrukturë në Komunën e Ferizajt, ka thënë për telegrafin se kjo rrugë ka qenë në projekte të komunë shumë më herët, por për shkak të problemeve pronësore nuk është realizuar.

“Ne e kemi pasur në projekte të komunës edhe këtë rrugë sikurse kemi realizuar shumicën e rrugëve të tjera nëpër lokalitete, mirëpo në këtë rast ka pasur pengesa nga banorët për shkak të kontesteve pronësore. Ndërkohë nuk kemi zhvilluar ndonjë procedurë për një projekt të ri në këtë rrugë, mirëpo presim që nëë vitin e ardhshëm të bëjmë një zgjidhje në bashkëpunim dhe me mirëkuptimin e banorëve”, ka thënë Hajdini./Telegrafi/