Komuna e Prizrenit intervenon në ndërtesat e banimit social, të pa përfunduara prej vitesh

Autoritetet komunale të Prizrenit të mërkurën kanë vizituar banesat sociale në lagjen Petrovë, për të parë finalizimin e punimeve në Kullën III.

Kryetari i Komunës së Prizrenit, Shaqir Totaj ka vlerësuar se ky projekt është i rëndësishëm për përmirësimin e kushteve të jetesës për disa kategori të rëndësishme të qytetarëve, duke përfshirë familjet e dëshmorëve, invalidët e luftës dhe rastet sociale. Sipas tij në këtë ndërtesë parashihen banesa për 30 përfitues, raporton Telegrafi.

“E rëndësishme është që Komuna po vazhdon me implementimin e projekteve aty ku ka nevojë sipas programit dhe premtimeve elektorale”, ka thënë Totaj.

Drejtori për Punë dhe Mirëqenie Sociale, Rasim Demiri ka theksuar se në këtë aspekt është bërë punë serioze me qëllim të ofrimit të strehimit për kategoritë e sipërpërmendura.

Ndërkaq zyrtari tjetër i kësaj drejtorie, Bashkim Rakaj ka sqaruar se në këtë ndërtesë punimet ndërtimore kanë filluar vite më parë dhe se pjesa e brendshme kishte mbetur pa u finalizuar, raporton Telegrafi.

“Një pjesë e brendshme është demoluar me kalimin e kohës”, ka thënë Rakaj, për të sqaruar se tanimë renovimi është drejt finalizimit me projektin që kap vlerën e 290 mijë eurove.

Sipas njoftimit të kryetarit Totaj, punimet kanë nisur edhe për renovimin e tërësishëm të Kullës IV, një tjetër ndërtesë me 30 banesa, që ka për synim të mundësojë kushte dinjitoze për familjet në nevojë. /Telegrafi/