Komuna e Obiliqit ndan pajisje bujqësore për 120 bujq

Komuna e Obiliqit ka ndarë sot pajisje bujqësore si subvencionet për 120 bujq të kësaj komune. Kjo mbështetje për fermerët ka ndodhur në bashkëpunim me ”Islamic Relief Kosova”.

Kryetari i Obiliqit, Xhafer Gashi tha se qëllim i mbështetjes së bujqve me pajisje bujqësore është lehtësimi i punës së fermerëve për të punuar tokën.

Kryetari Gashi paralajmëron se nga shkurti i vitit të ardhshëm do të ketë edhe pajisje tjera për fermerët tjerë.

“Duam të lehtësojmë punën fermerëve tonë. Ky është bashkëpunimi i tretë apo i katërt dhe besoj që do të vazhdojmë edhe nga shkurti me fermerë të tjerë. Janë rreth 120 bujq që përfitojnë pajisje të ndryshme, duke filluar nga kultivatorë, freza, stërpikëse dhe pajisje të tjera. Shpresojmë që këto do të jenë në funksion të tyre për lehtësimin e punës së tyre. Janë mbi 100 (mjete)”, tha Gashi.

Ndërsa, përfaqësuesja e ”Islamic Relief Kosova”, Albulena Gashi Hajrullahu u shpreh se kjo organizatë bashkëpunon me 22 komuna të Kosovës, në përkrahje të fermerëve dhe familjeve që janë në zhvillim të qëndrueshëm ekonomik.

“Organizata ”Islamic Relief Kosova” zakonisht bashkëpunon me komunat në përkrahje të fermerëve dhe familjeve që janë në zhvillim të qëndrueshëm ekonomik. Si organizatë kemi ndihmuar shumicën e komunave, ndërsa sot jemi në komunën e Obiliqit. Deri tash i kemi 22 komuna te Kosovës”, u shpreh ajo.

Vlera e këtij subvencionimi është mbi 120 mijë euro./kp/