Kompleksi sportiv në Leposaviq – Do të ketë fushë futbolli, hapësira të gjelbra e park rekreativ

Kryetari i Komunës së Leposaviqit, Lulzim Hetemi, ka dhënë detajet e plan-projektit për ndërtimin e kompleksit sportiv në Leposaviq.

Hetemi ka thënë se ndërtimi i kompleksit sportiv është rezultat i bashkëpunimit mes Federatës së Futbollit të Kosovës (FFK) dhe Komunës së Leposaviqit, shkruan Telegrafi.

Sipas tij, synimi kryesor i këtij projekti është krijimi i një infrastrukture moderne sportive.

Në këtë kompleks sportiv do të ketë një fushë futbolli me përmasa standarde ndërkombëtare, me bar artificial ose natyral, e pajisur me ndriçim për aktivitete edhe gjatë natës.

Hetemi ka thënë se do të ketë një ndërtesë multifunksionale me zyra për menaxhimin e kompleksit, hapësira për trajnerë, dhoma zhveshjeje për lojtarë dhe gjyqtarë, si dhe një qendër konferencash.

Tutje, do të ketë qendër mjekësore për trajtime emergjente gjatë aktiviteteve sportive, zona për aktivitete të tjera sportive si basketboll, volejboll dhe atletikë, hapësira të gjelbra, park rekreativ dhe zona për piknik për komunitetin lokal.

“Projekti do të jetë miqësor ndaj mjedisit, duke përdorur burime të qëndrueshme energjie dhe materiale ndërtimi ekologjike. Qasja do të jetë e siguruar për të gjithë, përfshirë personat me aftësi të kufizuara”, ka shtuar ai.

Kryetari i kësaj komune ka treguar se në zhvillimin sportiv, ky kompleks sportiv do të ndikojë në promovimin e futbollit dhe sporteve të tjera.

Në rritjen ekonomike, do të ndikojë përmes gjenerimit të të ardhurave përmes organizimit të ndeshjeve, turneve dhe aktiviteteve të tjera sportive.

Ndërsa në përfshirjen komunitare, ndërtimi i kësaj hapësire do të shërbejë si pikë grumbullimi për të rinjtë dhe komunitetin lokal.

“Ky kompleks synon të bëhet një simbol i unitetit, zhvillimit sportiv dhe një platformë për ngjarje të rëndësishme kombëtare dhe ndërkombëtare. Përfundimi i projektit pritet të sjellë një ndikim të qëndrueshëm pozitiv për komunitetin e Leposaviqit dhe gjithë rajonin përreth”, ka vijuar tutje kryetari i Komunës së Leposaviqit, Lulzim Hetemi. /Telegrafi/