Komiteti Olimpik i Kosovës (KOK) ka prezantuar sot kampanjën #GoldenEuropeans (Evropianët e artë) me të cilën do të rrugëtojë ekipi ynë olimpik drejt Lojërave Olimpike Paris 2024.
Prezantimi u bë pikërisht kur kanë mbetur edhe 50 ditë deri në ceremoninë hapëse të LO Paris 2024.
Udhëheqësi i Departamentit për Media në KOK, Kushtrim Krasniqi, deklaroi se deri tek përzgjedhja e këtij slogani kanë ardhur duke u frymëzuar nga historia e suksesshme e ekipit tonë olimpik në LO Rio 2016 dhe Tokio 2020, ku u fituan tri medalje, të tria të arta dhe të tria nga sporti i xhudos, për çka kërkoi nga mediat dhe përkrahësit tjerë të ekipit ta përdorin këtë slogan në shenjë mbështetje për sportistët tanë.
Krasniqi prezantoi edhe të gjitha përgatitjet që po bënë KOK-u, deri në nisjen e këtij edicioni të Lojërave Olimpike, si lansimi për herë të parë i Kuizit Olimpik, brendit 4F me të cilin do të vishet ekipin olimpik, përgatitjet për videon promovuese, Festivalin Olimpik, matjen dhe monitorimin medial etj.
Kuizi Olimpik do të bëhet në bashkëpunim me RTK-në, e cila njëkohësisht do të bëjë edhe transmetimin e Lojërave Olimpike Paris 2024, derisa do të bashkëpunojë me KOK-un edhe për Festivalin Olimpik.
Në lidhje me këtë foli Artan Muhaxhiri, udhëheqës i programit të sportit në RTK, i cili dha detaje për mënyrën se si do të realizohet Kuizi Olimpik, përmes të cilit KOK-u do të promovojë vlerat olimpike, ndërsa foli edhe transmetimin maratonik që Televizioni Publik do të bëjë me rastin e LO Paris 2024, ku në fokus do të jetë ekipi ynë.
Partner tjetër i kuizit olimpik është BKT Kosova, e cila për vendin e parë do të ndajë shumën në vlerë 1 mijë euro.
Kosova deri më tani ka gjashtë norma olimpike, pesë nga sporti i xhudos dhe një nga boksi, kurse lista përfundimtare do të zbulohet në fund të muajit qershor, kur pritet të kompletohet me ftesat e univerzalitetit, të rezervuar për sportet e notit dhe atletikës.
