KFC në 17 mijë restorante u shërben 12 milionë konsumatorëve brenda ditës

Ëndrra e një njeriu dhe pasioni i tij për gatimin, janë treguesi më i mirë për suksesin e KFC-së, e cila ndër vite është shndërruar në njërën ndër franshizat më të mëdha në botë.

Historia fillon me Harland Sanders, i lindur më 1890, në qytezën e vogël të Henryville në Indiana të SHBA-ve.Biografia jetësore dhe sfiduese e këtij njeriu fillon me humbjen e babait të tij që në moshë shumë të re, ku edhe barra për kujdesin ndaj familjes i kalon atij që në moshë shumë të re. Si rrjedhojë, ai e ka provuar veten në shumë punë, disa prej tyre edhe shumë të çuditshme, ku për pasojë edhe jetëgjatësia e punëve të tij ishte shumë e shkurtër.

Viti 1930 e gjen atë duke punuar në një pikë karburanti në qytezën e North Corbin, vend ky i cili përbën një pikë kthese në jetën e tij. Recetat e mësuara nga e ëma i dhanë ati famën, dhe nga ky epitet ai u detyrua që ta zgjerojë biznesin e tij duke hapur një lokal të ri. Ky ndryshim solli edhe zgjerimin e gamës së produkteve me bazë pulën.

Kështu në vitin 1936 Harland Sanders për herë të parë filloi ta përgatisë recetën e tij të famshme me pulë të fërguar.

Kjo recetë mori famën, duke e shtyrë Sanders që të eksperimentojë me erëza të ndryshme, derisa me kohë edhe arriti perfeksionimin dhe përshtatjen në recetat origjinale me përbërje prej 11 mëlmesash, në vitin 1940. Meqë recetat e tij patën sukses dhe filluan të pëlqehen në mënyrë masive në tërë Amerikën, Sanders vendosi që ta shesë recetën e tij, duke hapur kështu franshizën e parë sipas recetave të tij në vitin 1952.

Për hir të promovimit restauranti i parë u emërua “Kentucky Fried Chicken”, dhe prej këtij emërimi rrjedh edhe shkurtesa që do të fitonte famë botërore KFC. Fillimvitet e 60-ta e gjejnë KFC-në me më shumë se 600 restorante nëpër gjithë Amerikën, duke ofruar ushqime të përgatitura sipas recetës origjinale.Në vitin 1967 KFC arriti që të pozicionohet në vendin e gjashtë në bazë të shitjeve në kategorinë e restoraneve zinxhir në SHBA.

Emri dhe autoriteti i krijuar për një kohë të shkurtër, bënë që pronësia dhe menaxhimi i KFC-së ndër vite të kalojë nëpër shumë duar, deri në vitin 1997 kur grupi “Yum!” mori pronësinë përfundimtare. Në këtë periudhë KFC zgjeroi gamën e tyre të produkteve, duke shtuar në menunë e tyre edhe ëmbëlsira, sandëiche, pije dhe shtesa të tjera.

Në këtë periudhë vlera e përgjithshme e kompanisë arriti në 6.2 miliardë dollarë.

Sot KFC renditet e dyta në kategorinë e zinxhireve të ushqimit në mbarë botën me më tepër se 17 mijë restaurane të shpërndara anekënd botës, dhe shërben me shumë përkushtim më shumë se 12 milionë konsumatorë brenda ditës.