Këta janë kandidatët për kryetar të AGK-së

Asociacioni i Gazetarëve të Kosovës (AGK) do të mbajë të martën, duke filluar nga ora 14:00 , Kuvendin e tij zgjedhor e ku pritet të votohet për kryetarin/en dhe anëtarët e Bordit të këtij Asociacioni.

Kandidaturën për udhëheqjen e AGK-së deri më tani e kanë bërë publike tre gazetarë:.

Alban Selimi nga Radio Televizioni i Kosovës, Gentiana Begolli po ashtu nga Radio Televizioni i Kosovës si dhe Fitim Gashi nga Koha Ditore.

Që të tre kandidatët tashmë kanë bërë publike kandidaturën e tyre dhe kanë treguar edhe arsyet e kandidimit të tyre.

Alban Selimi përmes një shkrimi në profilin e tij në Facebook ka thënë se kandidimi i tij vjen pas një përvoje të gjatë pune që ka dhe duke qenë në lëkurën e gjithsecilit gazetarë.

“Pas një pune dhe angazhimi të pashoq të ish-anëtarëve të Bordit të AGK-së, veprimi i dorëheqjes së tyre për t’i hapur rrugë krijimit të kuorumit për zgjedhjen e ligjshme të kryetarit dhe anëtarëve të rinj, tregon edhe një herë se gazetarët bëjnë diferencën në mes të mirës vetanake dhe asaj të përgjithshme. Duke qenë në lëkurën e gjithsecilit, si kandidat për kryetar të AGK-së, i falënderoj gjithë ish-anëtarët e Bordit, që i hapën rrugë këtij procesi të rëndësishëm në një moment reformash në AGK, për çka ata do të kryesojnë të jenë meritorë”, ka shkruar Selimi që tutje ka përmendur pesë pika të cilat synon t’i realizojë përmes pozitës së kryetarit të AGK-së.

“Këto detyra burojnë nga vështirësitë dhe sfidat tona të përditshme që i kemi në terren gjithsecili prej nesh. Prandaj, me besimin tuaj si kryetar i AGK-së synoj që: 1. Ta luftoj çdo padrejtësi dhe shkelje të të drejtave të punës së gazetarëve përbrenda shtëpive mediale pa dallim; 2. Do trokas në gjitha zyrat e informimit të institucioneve të Kosovës kryesisht në ato qendrore, duke mos i përjashtu as ato lokale për t’i takuar përgjegjësit e këtyre zyrave, ku në prezencë edhe të eprorëve të tyre, do të kërkoj që këto zyra të mos jenë më një mekanizëm neutralizues për gazetarët, por se të njëjtat duhet të jenë në shërbimin të gazetarëve, duke iu ofruar një qasje sa më të lehtë dhe gjithëpërfshirëse në marrje të përgjigjeve; 3. Ndër sfidat më të mëdha të gazetarëve sot mbetet qasja në dokumente zyrtare, prandaj pareshtur do të angazhohem dhe do të jem zëri juaj i fuqishëm që këto kërkesa të real izohen nga institucionet siç edhe obligohen me ligj; 4. Do të provoj të rris transparencën gjatë periudhës së ndarjes së çmimeve për gazetarë, kudo që e përfshirë të jetë AGK. Me këtë rast, me miratimin edhe të Bordit, synim mbetet që gjatë procesit të vlerësimit të ketë edhe prezencë monitorimi nga vet institucionet medial”, ka shkruar ai duke elaboruar pak më tepër pikën e pestë.

Sipas tij, pasi që AGK tanimë ka krijuar bashkëpunim me institucionet e sigurisë dhe ato të drejtësisë siç janë Policia e Kosovës, Prokuroria e Shtetit, Këshilli Gjyqësor dhe mekanizmat tjerë relevant, si kryetar i AGK-së në pikën e pestë ai synon që ta thellojë këtë bashkëpunim.

“…dhe të konsolidoj edhe më shumë bashkëpunimin me këto institucione, ku çdo kërcënim apo sulm që mund t’iu bëhet gazetarëve, AGK e udhëhequr nga unë do të jetë pranë institucioneve përkatëse në mënyrë që të kemi një trajtim dhe reagim sa më të shpejtë dhe më gjithëpërfshirës të sulmeve, kërcënimeve apo çfarëdo rreziku tjetër që i ekspozohen gazetarët. Andaj, të nderuar kolegë, me mbështetjen tuaj, të gjitha këto synime do të jenë të realizueshme”, ka shkruar Selimi.

Edhe Fitim Gashi nga Grupi Koha, dhe gazetarë që mbulon çështje të politikës në gazetën Koha Ditore, ka treguar arsyet e kandidimit të tij për kryetar të Bordit të Asociacionit të Gazetarëve të Kosovës.

“Vendosa të garoj pas propozimit dhe mbështetjes së kolegëve brenda kompanisë ku punoj aktualisht – Grupit KOHA (Koha Ditore, KTV, Koha.net, Tv Arta), por edhe përkrahjes së kolegëve gazetarë nga mediet e tjera, me shumë prej të cilëve për 12 vjet kemi rrugëtuar bashkërisht. Kjo do të jetë një sfidë e re për mua, të cilën assesi nuk do ta konsideroj si privilegj, por përgjegjësi. Do të jetë përgjegjësi për faktin se punojmë në një ambient të vështirë ku nuk respektohet liria e shprehjes, ku gazetarët kërcënohen, fyhen e shantazhohen; nuk u lejohet qasja në informata e ku pushteti dhe politikanët ndërmarrin nisma ligjore, me qëllimin që t’i disiplinojnë e heshtin gazetarët dhe mediet”, ka thënë Gashi.

Duke treguar tutje se programin e plotë me të cilin po kërkon mbështetjen e kolegëve të tij do ta paraqes të martën gjatë kuvendit për zgjedhjen e kryetarit të bordit dhe anëtarëve të tij.

Gazetarja Gentiana Begolli ndërkaq nuk ka dashur të flas shumë për arsyen e kandidimit të , ngase tha se “si gazetarë, si asnjë komunitet tjetër, jemi ngopur nga fjalët”.

“Se çka dhe sa kemi punuar secili prej nesh, sa gëzojmë respekt për punën e bërë, çfarë integriteti njerëzor e profesional kemi, e dini më së miri edhe vet ju. Andaj ju ftoj që me 31 korrik të zgjidhni përfaqësuesin që ju mendoni se e meritoni. Ju falënderoj të gjithë juve që më mbështetët herën e parë, e që do të jeni përkrah meje edhe me 31 korrik…Na priftë e mbara bashkërisht”, ka shkruar ajo në profiling e saj në Facebook.

Ndryshe, AGK ka mbetur pa kryetar bordi dhe pa bord që prej nëntorit ë vitit të kaluar kur kryetari I asokohe Shkëlqim Hysenaj është dorëhequr.

“Kur e morëm përsipër ri funksionalizimin e AGK-së, e kishim në dispozicion vetëm një folder (certifikatë), ndërkohë që për një kohë të shkurtër arritëm që të rikthejmë komunikimin me donatorë dhe partnerët: vendor, regjional e ndërkombëtar. U bëmë pjesë e EFJ, IFJ, Rrjetit Regjional dhe me e rëndësishmja ishte arritja e komunikimit normal dhe vendosjes së standardeve të reja të bashkëpunimit, me Prokurorinë e Shtetit, Gjykatat dhe Policinë e Kosovës, gjithmonë me qëllim të rritjes së nivelit të sigurisë së gazetarëve në vend”, kishte shkruar Hysenaj asaj kohe duke kërkuar që AGK të përkrahet tutje.

“Pa u zgjatur shumë, dua të kërkoj nga të gjithë kolegët gazetarë që të përkrahin gjithmonë AGK-në, jo vetëm atëherë kur kanë nevojë (kjo ndodh shpesh), porse edhe atëherë kur mund të japin ndonjë kontribut profesional që do të mund të ndikonte në përmirësimin e pozitës së gazetarëve si dhe rritjen e standardit profesional të raportimit në media”, ka thënë ai.

Drejtori i sapo emëruar i AGK-së, Petrit Çollaku ka treguar për KosovaPress se përpos këtyre kandidimeve që janë publikuar mund të ketë edhe të reja që pranohen në ditën e Kuvendit zgjedhor.

Kushdo që merr postin e kryetarit të bordit do të përfundojë mandatin e lënë në gjysmë nga Hysenaj që i bie një vit e gjysmë. Mandati i kryetarit të AGK-së është tre vjeçar.