Kasami kërkon zgjedhje të parakohshme: Jam kundër eurointegrimeve që zhvillon Osmani dhe banda e Grubit

Kryetari i Lëvizjes Besa, Bilall Kasami pas akuzave nga pushteti se është kundër eurointegrimeve, theksoi se problemi është pikërisht tek qeveria aktuale dhe prandaj dëshiron të ketë zgjedhje të parakohshme.

Ai përsëriti qëndrimet se është e nevojshme të ketë zgjedhje të parakohshme parlamentare.

“Padyshim se jam kundër eurointegrimeve që i zhvillon Osmani dhe banda e Grubit. Sepse ato integrime nuk çojnë përpara drejt BE-së, por çojnë përpara drejt një qeverie të korruptuar dhe drejt një qeverie që nuk punon në interes të qytetarëve dhe përshpejtimit të procesit të integrimit evropian, por shkon prapa. I gjithë angazhimi i grupit të BDI-së në Qeveri është se si të pasurohen, jo si të ecet përpara me procesin e eurointegrimeve. Por fatkeqësisht gojën e kanë plot me eurointegrime, ndërsa në realitet çdo ditë punojnë që të rinjtë tanë të ikin në Evropë, e jo ne si vend të integrohemi në BE”, deklaroi Kasami pas mbledhjes së sotme në Këshillin e Komunës së Tetovës.

Sipas Kasamit, periudha më e mirë për zgjedhje të jashtëzakonshme është në pranverë. Ai thotë se deri atëherë do t’i artikulojë qëndrimet e tyre në strukturat partiake dhe planifikon edhe protesta nëse nuk ka zgjedhje të parakohshme.

“Ne si opozitë po konsolidojmë radhët tona që nga pranvera nëse nuk ka vesh për zgjedhje të parakohshme të artikulojmë pakënaqësitë e qytetarëve dhe nëse është e nevojshme do të organizojmë edhe protesta qytetare. Vlerësojmë se kjo qeveri nuk po përballet mirë me krizën ekonomike, veçmas me krizën energjetike ku çdo ditë ka rritje të çmimeve dhe nuk ka asnjë rast që të ketë ulje. Vlerësojmë që kjo qeveri është jofunksionale dhe nuk i zgjidh problemet e qytetarëve, prandaj duhet sa më shpejt të shkohet në zgjedhje”, tha Kasami.

Ai shton se për protestat nuk ka koordinim me partitë e tjera, pasi edhe vetë ata nuk kanë ndonjë propozim serioz dhe diskutim në organet e partisë.