Kapiteni i anijes me kontejnerë që u përplas me tankerin që transportonte naftë për ushtrinë amerikane – është shtetas rus

Kapiteni i Solong – anijes me kontejnerë të përfshirë në përplasjen në Detin e Veriut – është një shtetas rus, ka thënë pronari i anijes.

Pjesa tjetër e ekuipazhit ishin shtetas rusë dhe filipinas, sipas kompanisë së anijeve Ernst Russ, transmeton Telegrafi.

Kjo vjen pasi policia tha se një burrë ishte arrestuar nën dyshimin për vrasje të rëndë nga pakujdesia në lidhje me përplasjen e së hënës.

Policia e Humberside tha se një 59-vjeçar është në paraburgim, për të lejuar kryerjen e hetimeve dhe policët po flasin me të përfshirët për të zbuluar se çfarë ka ndodhur.

Hetuesit kanë nisur një hetim penal për shkakun e përplasjes midis Stena Immaculate dhe Solong në brigjet e East Yorkshire të hënën, dhe po punojnë me Agjencinë Detare dhe Rojet Bregdetare.

Tankeri funksiononte si pjesë e programit të sigurisë së cisternave të qeverisë amerikane, një grup anijesh komerciale që mund të kontraktohen për të transportuar karburant për ushtrinë kur të jetë e nevojshme.

Softueri i gjurmimit të anijeve tregoi se Stena Immaculate, ishte i palëvizshëm ndërsa Solong lundroi drejt dhe u përplas me të. Gjithashtu ka dalë se Solong dështoi në kontrollet e sigurisë në lidhje me drejtimin vitin e kaluar.

Dokumentet e inspektimit të kontrollit portual (PSC) nga korriku i vitit të kaluar, tregojnë se si zyrtarët paralajmëruan se “komunikimi/leximi i busullës së pozicionit drejtues emergjent” të anijes së ngarkesave ishte “i palexueshëm”.

Ishte ndër 10 çështjet e theksuara gjatë një inspektimi të anijes me flamur portugez. /Telegrafi/