Johnson mbron planin për Brexit: Do të dalim nga BE-ja natën e Halloween

Kandidati për kryeministër i Britanisë së Madhe, Boris Johnson, është gati që në muajin tetor ta largojë vendin nga Bashkimi Europian edhe pa një marrëveshje.

Ish-kryediplomati britanik tha në një intervistë për BBC se pakti ekzistues i negociuar nga kryeministrja në largim, Theresa May, ka marrë fund.

“Unë premtoj se do të dalim nga BE-ja natën e Halloween më 31 tetor. Miqtë dhe partnerët tanë duhet ta kuptojnë se e kemi seriozisht, dhe se jemi gati të çlirohemi nga retë e disfatizmit dhe negativitetit që na kanë mbështjellë prej kohësh”, tha Johnson.

Sipas Johnson, vendi nuk do të vuajë sa përflitet në aspektin ekonomik, pasi raportet tregtare me BE-në do të rregullohen nga Organizata Botërore e Tregtisë.

Ai shtoi se sapo të zgjidhet kryeministër, do të nisë përpjekjet për marrëveshje të re me Brukselin, përcjell oranews.tv.

Kandidati favorit për postin më të lartë qeveritar refuzoi të komentojë incidentet në jetën e private, dhe përkatësisht kontaktin e fundjavës së kaluar me policinë pas grindjes verbale me partneren në shtëpinë e tij.

Ndërkohë, një ditë më parë rivali dhe kryediplomati britanik Jeremy Hunt, theksoi se Johnson po i shmanget debateve ballë-për-ballë.

Njëri nga dy kandidatët e mbetur pritet të shpallet kryeministër dhe lider i konservatorëve në datën 22 korrik, kur do të shprehen me votë rreth 160 mijë anëtarë të Partisë Konservatore britanike.