Javën e ardhshme trajtohet kërkesa e Aganit për lirim nga detyra

Javën që vjen, kryeministri Isa Mustafa do të trajtojë kërkesën e ministrit Ferid Agani që të lirohet nga detyra e tij si ministër.

Kështu tha për KosovaPress zëdhënësi i Qeverisë, Arban Abrashi, duke shtuar se sot nuk kanë pasur mundësi që ta trajtojnë kërkesën për shkak të angazhimeve rreth ligjeve për EULEX-in.

Pas ngritjes së aktakuzës për shpërdorim të detyrës zyrtare, ministri i Mjedisit, Ferid Agani, ka kërkuar nga kryeministri që ta lirojë nga detyra deri në momentin e shpalljes së vendimit nga ana e gjykatës.

Në vijim mund ta lexoni letrën e plotë të ministrit Agani dërguar kryeministrit Mustafa.

“I nderuari z. Kryeministër,

Duke pas parasysh ngritjen e aktakuzës nga Prokuroria e Shtetit ndaj meje;

I bindur në pafajësinë time të plotë përkitazi me çështjen që është subjekt i aktakuzës;

Në pajtim me parimin e qeverisjes së pastër pa asnjë dyshim në bartësit e funksioneve publike; dhe

I përkushtuar që drejtësia të kryej punën e saj në mënyrë të papenguar,

Kërkoj nga ju që të më lironi nga detyra e Ministrit të Mjedisit dhe Planifikimit Hapësinor deri në momentin e shpalljes së pafajësisë sime të plotë”.