“Jahti fluturues” do të bëhet realitet në vitin 2023

Nëse mendoni se i keni parë të gjitha kur bëhet fjalë për konceptet unike të varkave dhe super jahteve, mendoni përsëri sepse vizionari francez Alain Thebault ka diçka të re.

Thebault ka projektuar “jahtin e parë fluturues në botë që funksionon me hidrogjen”, i cili do të bëhet realitet që në vitin 2023.

Pas projektit është startup-i zviceran Jet ZeroEmission, i cili ka partnerizuar me partnerët Zenith Marine dhe DWYN për të zhvilluar një anije të re pa emetime. “Jahti fluturues” do të prezantohet vitin e ardhshëm në Dubai dhe fluturimin e parë pritet ta realizojë gjatë konferencës së klimës COP28 në nëntor 2023 në Emiratet e Bashkuara Arabe.

Një jaht jokonvencional i quajtur Jet do të ketë një pamje futuriste, aliene dhe qelizat e karburantit me hidrogjen do të fuqizojnë motorët elektrikë që do të fuqizojnë në heshtje jahtin. Këto qeliza karburanti hidrogjeni do të gjenerojnë energji elektrike duke përzier hidrogjenin dhe oksigjenin.

Jahti do të jetë 10 metra i gjatë dhe do të ofrojë hapësirë të mjaftueshme për 13 persona duke përfshirë edhe kapitenin.

Ajo që e dallon këtë jaht nga superjahtet e tjera në treg është se do të jetë në gjendje të “fluturojë/notojë” mbi sipërfaqen e ujit.

Jahti do të mbahet mbi ujë falë hidrofoilave, të cilat në fakt janë tehe në formë krahësh të vendosura poshtë kuvertës dhe që “prejnë” ujin ndërsa jahti përshpejton, duke e ngritur kështu atë. Ky funksion është shumë i ngjashëm me funksionin e krahëve të aeroplanit. Këto hidrofoila mund ta ngrenë jahtin deri në 0.9 metra mbi ujë, dhe përveç kësaj ofrojnë lundrim më të rehatshëm pa rezistencë në krahasim me jahtet standarde.

Jahti Jet do të pajiset me softuer automatik që mundëson kontroll të lehtë të shpejtësisë dhe lartësisë. Kompania zvicerane pretendon se do të jetë në gjendje të arrijë një shpejtësi prej 74 km/h. /Telegrafi/