Izraeli ‘përgatit përgjigjen’ ndaj sulmit të Iranit ndërsa afrohet përvjetori i sulmit të 7 tetorit

Ushtria izraelite po zgjeron operacionet e saj në fronte të shumta në prag të përvjetorit të sulmit të 7 tetorit, duke përfshirë planifikimin për një hakmarrje “të rëndësishme dhe serioze” kundër Iranit për sulmin me raketa balistike në shkallë të gjerë të javës së kaluar.

Shenjat e hakmarrjes së afërt izraelite kundër Iranit vijnë pasi presidenti francez, Emmanuel Macron, bëri thirrje për një embargo ndërkombëtare për armët e dorëzuara në Izrael për përdorim kundër Gazas.

“Unë mendoj se sot, prioriteti është që ne të kthehemi te një zgjidhje politike, që të ndalojmë dorëzimin e armëve për të luftuar në Gaza”, tha Macron duke shtuar se Franca nuk po dërgon asnjë armë në Izrael.

Bëhet e ditur se Macron i bëri komentet e tij ndërsa Forcat e Mbrojtjes së Izraelit thanë se një sulm i madh ndaj Iranit ishte i pashmangshëm, shkruan the Guardian, përcjell Telegrafi.

“IDF po përgatit një përgjigje ndaj sulmit iranian”, tha një zyrtar ushtarak në kushte anonimiteti.

Ndërsa Izraeli tha se po planifikonte përgjigjen e tij ndaj sulmeve raketore iraniane të cilat goditën në ose pranë një numri bazash kryesore izraelite, presidenti amerikan, Joe Biden, paralajmëroi kundër sulmeve ndaj objekteve të naftës iraniane.

“Nëse do të isha në vendin e tyre, do të mendoja për alternativa të tjera përveç goditjes së fushave të naftës”, tha Biden gjatë një paraqitjeje të rrallë në konferencën e përditshme për shtyp të Shtëpisë së Bardhë.

Gjithashtu, administrata Biden ka deklaruar tashmë se kundërshton një sulm izraelit ndaj programit bërthamor të Iranit.

Mes dhunës në përkeqësim, spekulimet po forcohen se një sulm në periferitë jugore të Bejrutit ka vrarë Hashem Safieddine, i cili pritej gjerësisht të pasonte liderin e vrarë të Hezbollahut, Hassan Nasrallah.

Sipas burimeve libaneze të sigurisë, Safieddine ka qenë i paarritshëm që nga e premtja.

Vlerësimet sugjerojnë se Safieddine u vra me ndihmësit dhe këshilltarët iranianë në një sulm të fuqishëm që e ka bërë të vështirë arritjen e çdo trupi.

Pas sulmit, IDF tha se kishte goditur selinë e inteligjencës së Hezbollahut.

Ndryshe, luftimet vijnë ndërsa Izraeli përgatitet të shënojë përvjetorin e parë të sulmit shkatërrues të Hamasit të 7 tetorit që shkaktoi luftën aktuale në Gaza, e cila tani ka përfshirë Libanin, duke krijuar një krizë të rrezikshme rajonale. /Telegrafi/