Izraeli dëshiron më shumë marrëveshje paqeje me vendet arabe pas luftës kundër Hamasit dhe Hezbollahut, thotë Netanyahu

Kryeministri izraelit Benjamin Netanyahu tha të hënën se shpreson të arrijë marrëveshje paqeje me më shumë vende arabe pasi të përfundojë lufta kundër përfaqësuesve iranianë, Hamasit dhe Hezbollahut.

“Një ditë pasi Hamasi nuk e kontrollon më Gazën dhe Hezbollahu nuk gjendet më në kufirin tonë verior, ne po punojmë këto ditë në planet për të stabilizuar këto dy fronte. Por e nesërmja përfshin diçka tjetër me rëndësi të madhe”, citohet të ketë thënë Netanyahu në një fjalim në parlament.

“Unë aspiroj të vazhdoj procesin që drejtova disa vite më parë për nënshkrimin e Marrëveshjes historike të Abrahamit dhe të arrij paqen me më shumë vende arabe”, ka thënë më tej ai, shkruajnë mediat e huaja, përcjell Telegrafi.

Izraeli, sipas marrëveshjeve të vitit 2020 të ndërmjetësuara nga SHBA, normalizoi marrëdhëniet me katër vende arabe – Emiratet e Bashkuara Arabe, Bahreinin, Marokun dhe Sudanin.

Që atëherë, Izraeli, me mbështetjen e SHBA-së, ka kërkuar të përfshijë edhe vende të tjera, veçanërisht Arabinë Saudite.

Por Riadi thotë se nuk do ta njohë Izraelin pa krijimin e një shteti palestinez.

“Këto vende dhe vende të tjera, i shohin qartë goditjet që po u japim atyre që na sulmojnë ne, boshtin iranian të së keqes”, tha ai. “Ata aspirojnë, si ne, për një Lindje të Mesme të qëndrueshme, të sigurt dhe të begatë”. /Telegrafi/