Italia planifikon të shpenzojë 8.2 miliardë euro për tanke të reja?

Një komitet parlamentar italian miratoi të martën një plan të qeverisë me vlerë rreth 8.2 miliardë euro për të blerë tanke të gjeneratës së re dhe për të rinovuar forcat tokësore të ushtrisë.

Sipas mediave të huaja, përcjell Telegrafi, burimet thonë se plani është pjesë e një nisme më të gjerë nga qeveria e Giorgia Melonit për të nxitur prokurimin e mbrojtjes ndërsa Evropa dhe NATO po përballen me pasigurinë e shtuar gjeopolitike.

Sipas një dokumenti parlamentar të parë nga Reuters, programi do të zgjasë nga 2025 deri në 2038.

Rreth 5.4 miliardë janë tashmë të rezervuara, ndërsa marrëveshjet për financimin e 2.7 miliardë të mbetur nuk janë vendosur ende.

“Programi lidhet me blerjen e platformave të komponentëve të rëndë me referencë të veçantë për tankun kryesor të betejës së gjeneratës së re (MBT)”, thuhet në dokument.

Leonardo e Italisë dhe Rheinmetall e Gjermanisë thanë në korrik se zhvillimi i MBT-së italiane do të ishte një përparësi për sipërmarrjen e përbashkët që ata nisën këtë muaj.

Dokumenti parlamentar nuk përmend drejtpërdrejt dy firmat, por një nga burimet tha se sipërmarrja e përbashkët – e quajtur Leonardo Rheinmetall Military Vehicles ose LRM – pritej të ishte partneri kryesor industrial i projektit. /Telegrafi/