Ish-kryeministri britanik Brown bën thirrje për krijimin e një qeverisje botërore për të trajtuar COVID-19

Ish-kryeministri i Britanisë së Madhe, Gordon Brown ka kërkuar nga udhëheqësit botëror që të krijojnë një formë të përkohshme të qeverisjes në mënyrë që ta trajtojnë krizën ekonomike të shkaktuar nga pandemia e COVID-19.

Brown i cili ishte në krye të përpjekjes ndërkombëtare për ta trajtuar ndikimin ekonomik të krizës financiare të viteve 2008-2009, tha se është e nevojshme që të krijohen grupe pune nga udhëheqësit botëror, ekspertët ekonomik e shëndetësor dhe organizata në mënyrë që t’i koordinojnë punët, përcjell Telegrafi.

Në një takim virtual i cili pritet të mbahet nga 20 vendet më të zhvilluara të botës, Brown tha se do të preferonte që të përfshihet edhe Këshilli i Sigurisë i Kombeve të Bashkuara.

“Kjo nuk është diçka që mund të trajtohet në një vend. Duhet të ketë një përgjigje botërore të koordinuar”, tha Brown.

Ai shtoi se kriza e tanishme ndryshon nga ajo e një dekade më herët.

“Ky ishte një problem ekonomik që kishte pasoja ekonomike dhe kishte një zgjidhje ekonomike. Kjo para se gjithash është një urgjencë mjekësore dhe se duhet të ketë një veprim të përbashkët. Por sa më shumë të ndërhyni për t’u marrë me një urgjencë mjekësore, aq më shumë e rrezikoni ekonominë”, shtoi ai.

Brown tha se propozimi i tij do ta luftonte krizën në dy fronte, sipas tij, duhet të ketë një përpjekje për ta gjetur vaksinën dhe në anën tjetër duhet të ketë koordinim për prodhimin, blerjet dhe parandalimin e keqpërdorimeve. /Telegrafi/