iPhone i Apple merr funksionin “Clean Energy Charging”

Edhe pse iOS 16 sapo ka ardhur, Apple tashmë ka zbuluar detaje se çfarë do të ndodhë më pas për këtë sistem operativ.

Bëhet fjalë për një funksion të quajtur Clean Energy Charging, të cilin kompania do t’ua ofrojë përdoruesve në SHBA pak më vonë këtë vit si pjesë e një përditësimi. Ky funksion do të optimizojë kohën e karikimit për periudhën kur rrjeti elektrik përdor burime më të qëndrueshme të energjisë. Apple thotë se qëllimi është të zvogëlojë gjurmën e karbonit të iPhone.

Kjo veçori plotëson opsionin Optimizing Battery Charging që Apple prezantoi disa vite më parë për të maksimizuar “shëndetin” e baterisë. Duke aktivizuar këtë cilësim, iPhone “mëson” rutinën ditore të karikimit dhe kufizon ngarkesën e baterisë në 80 për qind në momentin që përdoruesi fillon të përdorë sërish iPhone ose Mac të tij, i cili gjithashtu ka të njëjtin funksion.

Përveç kësaj, iCloud Shared Photo Library po vjen gjithashtu këtë vit, dhe ka të bëjë me krijimin e një biblioteke të veçantë iCloud që mund të aksesohet nga deri në gjashtë persona. Apple do të prezantojë gjithashtu mbështetje për standardin e shtëpisë inteligjente Matter kur të bëhet i disponueshëm këtë vjeshtë.

Përdoruesit e iPhone të pajtueshëm me iOS 16 tani kanë akses në një sërë veçorish të reja që lidhen kryesisht me personalizimin.

Veçoria Live Activities e bën të lehtë gjurmimin e disa gjërave në kohë reale, të tilla si statusi i dorëzimit ose rezultatet sportive. Opsioni për të redaktuar dhe marrë mesazhet e dërguara në aplikacionin iMessage do të jetë një punë e madhe për shumë njerëz, si dhe aftësia për të kopjuar dhe “ngjitur” objekte nga një foto në tjetrën. /Telegrafi/