Intensifikohen luftimet midis Izraelit dhe Hezbollahut – pavarësisht përpjekjeve diplomatike

Luftimet midis Hezbollahut dhe Izraelit janë intensifikuar gjatë fundjavës, pavarësisht përpjekjeve diplomatike për të ulur tensionet midis të dyja palëve dhe për të parandaluar një sulm të pritshëm të Hezbollahut dhe Iranit kundër Izraelit.

Një sulm izraelit të shtunën ishte një nga më të përgjakshmet për civilët që nga fillimi i luftimeve në tetor, duke vrarë 10 punëtorë sirianë dhe anëtarët e familjeve të tyre në atë që Izraeli tha se ishte një sulm në një depo armësh të Hezbollahut në Nabatieh, Libani jugor.

Si përgjigje, Hezbollahu lëshoi një breshëri 55 raketash në qytetin Ayelet HaShahar, në veri të Izraelit, shkruajnë mediat e huaja, përcjell Telegrafi.

Tre paqeruajtës të Unifil u plagosën gjithashtu lehtë në një shpërthim të dielën ndërsa po patrullonin në qytetin kufitar libanez Yarin.

Një burim brenda Unifil tha se ata besonin se ushtarët ishin plagosur nga një sulm ajror i afërt izraelit, por se ata ende po hetonin incidentin.

Kërcënimi i një lufte në shkallë të plotë duket më i madh se kurrë pas 10 muajsh luftimesh midis Izraelit dhe Hezbollahut, të shkaktuar nga lëshimi i raketave ndaj Izraelit nga ky i fundit “në solidaritet” me sulmin e 7 tetorit të Hamasit.

Hezbollahu dhe Irani janë zotuar të hakmerren kundër Izraelit për vrasjen e shefit të shtabit ushtarak të Hezbollahut, Fuad Shukr në Bejrut dhe liderit të Hamasit, Ismail Haniyeh në Teheran.

Izraeli nuk ka marrë përgjegjësinë për vrasjen e Haniyeh, por ka një histori të kryerjes së atentateve në shënjestër në të gjithë rajonin.

SHBA dhe fuqitë e tjera perëndimore janë përfshirë në diplomaci të furishme që nga atentatet e dyfishta në Bejrut dhe Teheran. /Telegrafi/