Institucionet shtetërore shpenzuan në media mbi 800 mijë euro

Asociacioni i Gazetarëve të Kosovës (AGK) sot ka lansuar raportin “Paraja publike e shpenzuar në media (2016)”, ku u prezantuan të dhënat statistikore financiare rreth shpenzimit të parasë publike për informim publik.

Gjatë konferencës, AGK sqaroi metodologjinë dhe punën që është bërë gjatë procesit të hulumtimit si dhe telashet që janë shfaqur në këtë proces.

Shuma totale e mjeteve të shpenzuara për informim publik nga institucionet e vendit është 812,130.36 euro.

“Kjo shumë përfshin të gjitha format e pagesave që ju kanë bërë mediave qoftë nga institucionet qendrore apo ato komunale”, thuhet në njoftim.

Raporti gjithashtu sjell edhe 6 rekomandime të cilat do të ndihmonin pasqyrimin më të qartë dhe transparencë në shpenzimin e fondeve publike për kategori të ndryshme të informimit publik – duke përfshirë kategori të ndryshme siç janë: publikime dhe shpallje, reklama, shërbime mediale, transmetim të seancave, subvencione dhe grante në varësi nga institucioni përkatës. /Telegrafi/