Institucionet shtetërore shkelin rregullat e prokurimit publik, D+ publikon raportin e monitorimit

Demokraci Plus (D+) ka publikuar një raport të detajuar mbi monitorimin e lidhjes së marrëveshjeve për shërbime të veçanta (MShV) në nivel qendror dhe lokal, duke vërejtur disa shkelje të rënda të procedurave dhe rregulloreve të prokurimit publik nga disa institucione shtetërore.

Institucionet e monitoruara janë: Ministria e Mjedisit, Planifikimit Hapësinor dhe Infrastrukturës (MMPHI), Ministria e Kulturës, Rinisë dhe Sportit (MKRS), Ministria e Industrisë, Ndërmarrësisë dhe Tregtisë (MINT), Ministria e Arsimit, Shkencës, Teknologjisë dhe Inovacionit (MAShTI), Agjencia e Ushqimit dhe Veterinarisë (AUV), Komuna e Prishtinës, Pejës, Vitisë dhe Prizrenit.

Sipas raportit, disa ministri dhe komuna kanë shpërdorur marrëveshjet për shërbime të veçanta për të angazhuar konsulentë për detyra që mund të ishin mbuluar nga stafi aktual i institucioneve.

Një shembull i tillë është Ministria e Mjedisit, Planifikimit Hapësinor dhe Infrastrukturës (MMPHI), e cila, siç theksohet në raport, ka shpërblyer një konsulent që nuk kishte ofruar metodologji të punës, edhe pse kjo kërkesë ishte e detyrueshme për vlerësimin teknik të ofertës.

“MMPHI ka vlerësuar me pikë maksimale një kandidat, edhe pse nuk kishte ofruar metodologji të punës,” thuhet në raportin e D+.

Një tjetër problem është evidentuar në Ministrinë e Industrisë, Ndërmarrësisë dhe Tregtisë (MINT), ku është angazhuar një ekspert ndërkombëtar për hartimin e një strategjie, duke shpërfillur rregullat e Ligjit për Prokurim Publik.

“MINT ka eliminuar të gjithë ekspertët vendor që kanë përvojën relevante për të aplikuar në tender,” theksohet në raportin e D+.

Edhe Ministria e Kulturës, Rinisë dhe Sportit (MKRS) është kritikuar për angazhimin e një konsulenti për kryerjen e punëve që duhej të mbuloheshin nga stafi i ministrisë, si dhe për përdorimin e MShV-ve për të zgjatur afatet për konsulentët e kontraktuar.

“MKRS ka përdorur MShV-të për zgjatjen e afatit të punës për konsulentët e kontraktuar përmes prokurimit për shërbime të veçanta,” theksohet në raport.

Në nivel lokal, Komuna e Prizrenit ka përdorur marrëveshjet për shërbime të veçanta për të kontraktuar konsulentë për detyra administrative dhe teknike që duhej të realizoheshin nga stafi i komunës.

“Komuna e Prizrenit ka shfrytëzuar MShV-të për të kontraktuar konsulentë të cilët kryejnë punë të rëndomta teknike-administrative,” thuhet në raport.

Për më tepër, Komuna e Pejës ka kontraktuar kandidatë të cilët kanë ofruar biznes dhe jo si konsulentë individualë, duke shkelur kërkesat e tenderit.

“Komuna e Pejës ka kontraktuar kandidatë të cilët kanë ofertuar me biznes e jo si konsulent individual,” thuhet në raport.

Nga ana tjetër, Agjencia e Ushqimit dhe Veterinarisë (AUV) dhe MAShTI gjithashtu janë kritikuar për mos përcaktimin e kritereve për vlerësim teknik të ofertave dhe për përdorimin e MShV-ve për të zgjatur afatet për punën e konsulentëve.

Komuna e Vitisë nuk i ka paraqitur saktësisht të dhënat në lidhje me vlerën e tenderit duke shkaktuar paqartësi te kandidatët e interesuar për ofertim dhe nuk ka respektuar afatin kohor për caktimin e afatit për dorëzim të ofertave sipas Ligjit për Prokurim Publik.

Edhe Komuna e Prishtinës nuk ka respektuar procedurën ligjore e cila duhet të përdoret për lidhjen e MShV-ve. Komuna ka përcaktuar si kriter “tenderi me çmimin më të ulët”, ndërsa kriteri
“tenderi ekonomikisht më i favorshëm” është ai që përdoret për lidhjen e MShV-ve.

Në lidhje me këto shkelje, D+ ka bërë disa rekomandime për përmirësimin e procesit të prokurimit publik.

“Institucionet publike duhet të përdorin MShV-të vetëm për angazhimin e kandidatëve për shërbime specifike dhe të veçanta, të cilat nuk mund të mbulohen me pozitat e vendeve të punës të definuara me Katalogun e vendeve të punës në shërbimin civil,” thekson raporti i D+.

Po ashtu, D+ sugjeron që Ministria e Financave, Punës dhe Transfereve (MFPT) të rregullojë qartë kontraktimin e shërbimeve përmes MShV-ve në Ligjin e ri të Prokurimit Publik dhe që të gjitha institucionet të respektojnë kriteret e përcaktuara në Rregulloren e Prokurimit Publik për të siguruar transparencë dhe konkurrencë të ndershme. /Telegrafi/