Imazhe që tregojnë sesi Gjeneva duket për shkak të takimit Biden-Putin, mijëra policë e ushtarë në teren – rrugët e boshatisura

Gjeneva sot po duket e pazakontë, e qetë dhe me rrugë të zbrazëta, pasi autoritetet zvicerane për shkak të takimit mes presidentit amerikan dhe atij rus, kanë rritur masat e sigurisë – duke pamundësuar një trafik të zakonshëm në afërsi të liqenit të Gjenevës – Monblan dhe parkun La Grange, ku do të mbahet samiti në vilën luksoze.

Në rrugët e Gjenevës ka shumë pak vetura, për këtë qyteti po duket i pazakontë për një dite të zakonshme pune, kështu janë vendosur punkte të shumta policore dhe janë mbyllur shumë rrugë, e aktualisht është i pamundur kalimi mbi urën Monblan, që është dekoruar me flamujt e SHBA-ve dhe Rusisë.

Parku La Grange dhe rrethina e saj janë të mbuluara me rrethoja të metalta dhe tel gjembor, kurse ndalohet parkimi i veturave në afërsi të zonës, transmeton Telegrafi.

Kufizime janë vënë edhe në përdorimin e hapësirës ajrore mbi Gjenevë, kurse në liqenin e Gjenevës ndalohet peshkimi, noti dhe shumë aktivitete tjera.

Gjithashtu ndalohen tubimet masive në anën e djathtë të liqenit të Gjenevës ku do të mbahet samiti, e autoritetet lokale u kanë bërë thirrje qytetarëve që të jenë të përgjegjshëm dhe të kenë mirëkuptim me qëllim që ngjarja të kalojë pa ndonjë problem.

Përveç 2,000 policëve në Gjenevë, autoritetet federale kanë dërguar ndihmë edhe 900 policë nga rajonet e tjera të Zvicrës si dhe 1,000 ushtarët që ruajnë misionet diplomatike dhe ndjekin situatën në qiell.

Një batalion i ushtrisë do të patrullojë në aeroportin e Gjenevës, derisa një pjesë tjetër do të sigurojnë kufijtë e kantonit. Samiti amerikano-rus po mbahet sot në Gjenevë, dhe do të jetë takimi i parë zyrtar mes Joe Biden dhe Vladimir Putinit. /Telegrafi/