Humb kontrollin e motorit dhe bie në kanal, humb jetën punonjësi i FNSH-së në Shkodër

Një efektiv i Forcave të Ndërhyrjes së Shpejtë (FNSH) ka humbur jetën mbrëmjen e djeshme teksa kthehej në shtëpi në fshatin Bardhaj në Shkodër. 

Punonjësi i FNSH dyshohet se ka humbur kontrollin e motorit dhe më pas është gjetur i vdekur.

Burime nga policia thonë se ngjarja është aksidentale.

Njoftimi i policisë:

Rreth orës 02:50, në fshatin Bardhaj, shtetasi N. L., 51 vjeç, (punonjës policie i Forcës Kombëtare të Sigurisë, Njësia Shkodër, i cili ishte jashtë orarit të shërbimit), duke drejtuar motomjetin e tij, dyshohet se ka humbur kontrollin mbi drejtimin e motomjetit, si pasojë e motit të keq, dhe për pasojë motomjeti ka dalë nga rruga, duke rënë në një kanal me ujë.

Shtetasin N. L. e ka marrë rrjedha e ujit dhe për pasojë ka humbur jetën.

Shërbimet e Policisë, përgjatë orëve të mëngjesit, gjatë kontrollit të kanalit që të çon në lumin Kir, kanë bërë të mundur gjetjen e trupit të pajetë të 51-vjeçarit.

Grupi hetimor vijon punën për sqarimin e rrethanave dhe dokumentimin ligjor të këtij rasti. /Telegrafi/