Hulumtimi: Qentë mund të dallojnë gjuhët e ndryshme

Truri i qenve mund të bëjë dallimin midis gjuhëve të njohura dhe të panjohura

Qentë mund të dallojnë gjuhët, zbuluan shkencëtarët hungarezë pasi një grupi prej 18 qensh i emetuan fragmente nga tregimi “Princi i Vogël” në spanjisht dhe hungarisht dhe ekzaminuan se si reagoi truri i tyre.

Hulumtimi u drejtua nga Laura V. Cuaya nga Universiteti Eotvos Lorand në Budapest, e cila u zhvendos nga Meksika në kryeqytetin e Hungarisë disa vite më parë, duke marrë me vete qenin e saj Kun-kun.

“Unë pyesja veten nëse Kun-kun vuri re që njerëzit në Budapest flisnin një gjuhë tjetër, hungarisht”, tha ajo, transmeton Telegrafi.

“Në hulumtim, ne zbuluam për herë të parë se truri jo njerëzor mund të dallojë gjuhët”, shtoi ajo.

Në jetën e tyre me njerëzit, qentë adoptojnë modele dëgjimore të gjuhës ndaj së cilës janë të ekspozuar.

Gjatë eksperimentit, Kun-kun dhe qentë e tjerë u trajnuan të shtriheshin pa lëvizur në një skaner truri për disa minuta.

Të gjithë qentë kanë dëgjuar vetëm një nga dy gjuhët – hungarisht ose spanjisht – nga pronarët e tyre më parë, gjë që i lejoi shkencëtarët të krahasonin sesi truri i tyre reagon ndaj një gjuhe shumë të njohur me një gjuhë krejtësisht të panjohur.

Qentë dëgjuan fragmente nga tregimi në spanjisht dhe hungarisht, si dhe versione të shtrembëruara nga kompjuteri të atyre pasazheve për të parë nëse mund të dallonin mes të folurit dhe jo të folurit.

Në korteksin dëgjimor sekondar, i cili analizon tingujt kompleksë, truri i qenit prodhon modele të ndryshme aktiviteti kur dëgjon një gjuhë të njohur dhe një gjuhë të panjohur.

Sa më të vjetër të jenë qentë, aq më mirë truri i tyre mund të dallojë midis dy gjuhëve. /Telegrafi/