Haziri: Sot dhanë dorëheqje kryetari dhe kryesia e LDK-së

Pas dorëheqjes së liderit të LDK-së, Isa Mustafa, si pasojë humbjes së thellë në zgjedhjet e djeshme, nënkryetari i kësaj partie, Lutfi Haziri ka thënë se është hapur rruga për mobilizimin politik dhe zgjedhjet e jashtëzakonshme në këtë parti.

Haziri, përmes një postimi në Facebook, ka thënë se dorëheqja e kryetarit të LDK-së dhe Kryesisë, hap rrugë që të ftohet Kuvendi i LDK-së dhe zgjidhet kryetari e Kryesia e re në nivel vendi.

“Si asnjëherë më parë në historinë e LDK-së nuk ka ndodhur që Kryetari, Nënkryetari, Sekretari dhe Kryesia, të japin dorëheqje për shkak të rezultatit zgjedhor”, ka thënë Haziri, përcjell Telegrafi.

“Kjo është arritur sot pas aktit të tërheqjes së Isa Mustafës nga pozita e kryetarit dhe nga tash është hapur rruga për mobilizimin politik dhe zgjedhje të jashtëzakonshme të LDK-së”

“Po ashtu, edhe ne në Gjilan nga sot do të veprojmë njëjtë. Debati i brendshëm do të përcillet me largimin e dobësive tona që shkaktuan pakënaqësi te qytetarët dhe votuesit”.

Haziri më tej ka thënë se “ne duhet të merremi mërgatën tonë, familjen tonë politike, pakënaqësitë tona të brendshme, pa u ndikuar nga ata që dëshirojnë Rugovizmin ta dërgojnë në histori”.

“LDK duhet të vazhdojë t’i bashkojë të gjitha pjesët e saj, brenda e jashtë, për rikthimin e madh. Të kontribuoj në stabilitetin e vendit dhe mirëqenien e Republikës”.

“E uroj VV-në dhe Vjosa Osmanit për suksesin në këto zgjedhje!”, ka shkruar Haziri. /Telegrafi/