Havolli: Vizitat e Kryeministrit nëpër komuna në funksion të koordinimit të politikave

Këshilltari i kryeministrit Isa Mustafa, Sokol Havolli në emisionin Ora e Fundit të Klan Kosovës ka folur në lidhje me vizitat e fundit që kryeministri  ka bërë nëpër komunat e Kosovës.

“Si vizitat e vitit të kaluar nëpër komuna, edhe këtë vit, por edhe vizitat e kryetarëve të gjitha janë në funksion të koordinimit të politikave të përgjithshme të qeverisë me qëllim të forcimit të zhvillimit ekonomik”, tha ai.

Për vizitën e Mustafës në regjionin e Dukagjinit e sidomos në Pejë, Havolli tha se ai asnjëherë nuk u pyet për cështjen e Demarkacionit sepse sipas tij kjo cështje tashmë është qartësuar.

“Qytetarët që kanë qenë aty nuk e kanë përmendur këtë cështje, fokusi ka qenë në zhvillimin ekonomik. Kur gjërat sqarohen në mënyrë të drejtë prej të gjitha komisioneve edhe atyre ndërkombëtar, natyrisht që edhe shqetësimet e tyre shkojnë duke u qartësuar”.

Havolli ka thënë se vizitat e tij nuk kanë të bëjnë me ndonjë fushatë të mundshme për zgjedhje të parakoshme si dhe sipas Havollit është vetëm rastësi pse këto vizita po kryhen në këtë kohë e jo në kohën e protestave të opozitës.

“Këto vizita kanë qenë edhe vitin e kaluar, gjithë këto vizita kanë qenë pa marrë parasysh situatës e përgjithshme politike, nëse i referohemi opozitës ato natyrisht që e përqojnë mesazhin tek qeveria, e cila i ka adresuar. Njëra ndër vizitat më domethënëse kanë qenë në Vushtrri, Obiliq që ka ndodhur para protestës e cila më vonë është anuluar”, tha ai.

Por ai ka thënë se edhe pse Mustafa dhe ministrat e kabinetit të tij qeveritar disa kohë më parë janë “sulmuar” nga përkrahësit e opozitrëve, ata prapë se prapë kanë dal në terren. Mirëpo ai e pranon se tashmë situate është më e mirë.

“Tash është një situatë më e këndshme, sepse po zhvillohet një bisedë edhe me bizneset. Është situatë më e këndshme kur i sheh reflektimet e politikave ekonomike”.

Havolli nuk e ka përjashtuar edhe kryeqytetin në vazhdën e vizitave që Mustafa po bënë në komunat e Kosovës.

“Mund të vizitohet një ditë edhe Prishtina. Ne edhe vitin e kaluar kemi pasur takim me udhëheqësin e Prishtinës për disa projekte”.

Për zbulimin më të madh gazetaresk “Panama Papers” dhe përfshirjen e mundshme të politikanëve kosovarë, Havolli ka thënë se nuk di më shumë se sa informatat që i ka marrë në media.

“Nuk ka ndonjë informacion për përfshirjen e Kosovës, ne i kemi të njëjtat informata që i keni edhe ju. Nuk do të ketë ndonjë rast që ndërlidhet me zyrtarët e qeverisë së Kosovës”, tha Havolli.