Lajme Kosovë Politikë

Haradinaj- Stublla e quan “kryetoksik” Pal Lekajn dhe kërkon rinumërim total të votave

Para 4 vitesh

Kandidatja e AAK-së për deputete, Meliza Haradinaj-Stublla, e cila sot ka dhënë dorëheqje nga posti i ministres së Punëve të Jashtme si dhe nga të gjitha funksionet në AAK dhe nga anëtarësia pas audio-incizimeve ku pretendohet se janë bërë manipulime me vota, ka kërkuar rinumërim total të votave të zgjedhjeve të 14 shkurtit.

Haradinaj-Stublla, në një postim në Facebook, ka reaguar edhe ndaj një deklarate të bashkëpartiakut të saj dhe nënkryetarit të AAK-së, Pal Lekaj, pasi ky i fundit në një medium sotkja thënë se vendimi i Haradinaj-Stubllës është i ngutshëm dhe ka ardhur në një moment jo të përshtatshëm, pasi që, sipas tij, një veprim i tillë është dashur të merrej atëherë kur racionaliteti vendoset mbi emocionet personale.

“Unë e vlerësoj znj Haradinaj-Stublla për angazhimin dhe profesionlizmin e treguar ndër vite në AAK mirëpo më duket se ajo është ngutur me vendimin e saj për tu larguar nga AAK në këtë kohë kur gjërat ende janë të padefinuara dhe veprime të tilla kaq të mëdha bëhen në momente më të qeta dhe kur racionaliteti vendoset mbi emocionet personale por në fund të fundit vendimet i takojnë asaj dhe neve na mbetet vetëm t’i respektojmë”, kishte deklaruar sot Lekaj për një portal.

E, Haradinaj Stublla ka akuzuar rëndë nënkryetarin e AAK-së, Lekajn, duke e quajtur “kryetoksik”.

“I shokuar nga rezultati i natës së zgjedhjeve, pas mbylljes së vendvotimeve dhe numërimit në Gjakovë, ishte pikërisht ky që tregojnë shumë burime se ‘shantazhoi e kërcënoi’ të gjithë mbështetësit e sinqertë të AAKsë që përkrahën kandidatë të tjerë, specifikisht JO atë dhe rrethin e tij të të panjohurve dhe të sapoaderuarve në listë. I mbajti hermetike rezultatet e Gjakovës për kandidatët e AAK-së për dy ditë rresht, me siguri që për asnjë arsye të shëndoshë”, ka thënë Haradinaj-Stublla, për Lekajn.

Postimi i plotë i Haradinaj – Stublla:

“RINUMËRIM TOTAL

Kryetoksiku paska ‘vlerësuar’ punën, kontributin, dhe bashkëpunimin me mua, duke thënë se nuk e ka kuptuar saktësisht deklaratën time… e mu për këtë arsye, po ia plotësoj me gjithë qejf dëshirën.

Nënkryetari ‘i përhershëm dhe i pamposhtur’, i cili trembi e largoi shumë figura të dinjitetshme e kredibile nga strukturat e degës në Gjakovë, dhe nga kryesia qendrore e partisë, vetëm e vetëm për të mos humbur ‘pushtetin’ e tij përbrenda partisë, duke qëndruar me insistim afër kryetarit Haradinaj. Fakt i mirënjohur tashmë që ka shumë të tillë si ky zotëriu përreth aty, nga të gjitha anët, por meqë paska reaguar pa e pyetur kush, si po të ndihej fajtor – po merrem me të, sa për të gjithë.

I shokuar nga rezultati i natës së zgjedhjeve, pas mbylljes së vendvotimeve dhe numërimit në Gjakovë, ishte pikërisht ky që tregojnë shumë burime se ‘shantazhoi e kërcënoi’ të gjithë mbështetësit e sinqertë të AAKsë që përkrahën kandidatë të tjerë, specifikisht JO atë dhe rrethin e tij të të panjohurve dhe të sapoaderuarve në listë. I mbajti hermetike rezultatet e Gjakovës për kandidatët e AAK-së për dy ditë rresht, mesiguri që për asnjë arsye të shëndoshë.

Jam tani mjaft me përvojë – zotëri, dhe vitet që kam përpara, më duhet t’i shpenzoj për të realizuar të vërtetën time, misionin tim, ëndrrën e gjeneratës sime, e jo të vazhdoj të qëndroj e heshtur para ‘kriminaliteteve të shumëllojshme’ të njerëzve si ti e rrethi yt, që kujtoni se jeni të barabartë me mua e mund të vlerësoni punën e kontributin tim që as se kuptoni, as skeni kapacitet intelektual t’a komentoni, e as që keni bashkëpunuar ndonjëherë me mua për të më njohur.

Të jeni i bindur zotëri, që shpesh mendoj se për nivelin që e keni, i keni shumë mirë punët. Dhe jam e lumtur që mirëqenia ime dhe e familjes sime nuk është varur e nuk varet nga rrethi yt – siç varen disa pseudo portale e disa të ‘sapoaderuar.’ Sepse t’kishte qenë kështu, më kishit lënë në grevë urie derisa t’ju kisha bërë ndonjë favor, apo derisa t’i kisha mbyllë sytë përpara piramidës tuaj të dyshimtë, për mos të thënë kriminale.

Të kërkoj falje që e zgjata – zotëri ‘i pamposhtur’ – ndoshta edhe të ka marrë gjumi me lexim deri tash në këtë paragraf. Por jam e obliguar ta këpus vrullin ty e secilit deliranti si ty, që ka vetëbesimin të më reagojë.