Hapet Ura e Madhe e Kukësit pas disa muajsh vonesë

Kryeministri i Shqipërisë Edi Rama, i shoqëruar nga zëvendës-kryeministrja Belinda Balluku, ka inauguruar sot Urën e Madhe të Kukësit, pas disa muaj vonesë nga premtimi fillestar i shefit të qeverisë.

Ura e re me një kosto prej 40 milionë eurosh lehtëson trafikun drejt Kosovës duke evituar urën e vjetër në hyrje të qytetit të Kukësit.

“Një vepër mbresëlënëse, e cila çliron përfundimisht qarkullimin e ngërçosur prej vitesh dhe i jep një përgjigje kuptimplotë të gjitha qyqeve që mbushën rrjetet sociale me vrer lajmesh të rreme, ndërkohë që po siguroheshin edhe akseset e komuniteteve përreth,” ka shkruar Rama në Facebook.

Kryeministri Rama e konsideroi urën një vepër mbresëlënëse, e cila çliron përfundimisht qarkullimin e ngërçosur prej vitesh.

“Ky investim i jep një përgjigje kuptimplotë të gjitha qyqeve që mbushën rrjetet sociale me vrer lajmesh të rreme, ndërkohë që po siguroheshin edhe akseset e komuniteteve përreth”, u shpreh Rama.

“Është shumë e rëndësishme që ura hapet për të gjithë, edhe për ata që çfarë nuk thanë për urën, deri te lajmi nga penxherja që ju këputën këmbët urës. Ndërkohë që kjo nuk ka këmbë sepse e ka trupin të shtrirë përgjatë një hapësire drite, që është ndër më të mëdhatë e një ure në Eruopë”, tha Rama.

Kryeministri theksoi se falë talentit dhe eksperiencës së projektuesit italian, por edhe falë punës së bërë nga kompania, ajo u hap.

“Ura mbaroi por duheshin plotësuar edhe kushtet për 2 apo 3 komunitete të tjera rreth kësaj zone, të cilave iu duhej dhënë akses që të garantohej lehtësia e transportit për ta”, tha Rama.

Balluku vuri në dukje se kur është marrë në dorëzim Rruga e Kombit, ishte një rrugë pothuajse as në gjysmë të volumeve të saj përfundimtare dhe ne vazhdojmë me përmirësimin e saj.

Në këtë drejtim, Rama tha se nga pikëpamja e trasesë rruga ishte e hapur me këto ngërçet e tmerrshme në hyrje të Kukësit dhe në zonën ku u ndërtuan ato urat e tjera, por nga pikëpamja e volumeve, garancive dhe standardeve ishte bërë vetëm gjysma e volumit të punës.

Balluku e konsideroi urën një vepër arti, ndërsa u shpreh se ajo është dizenjuar nga një prej arkitektët më të njohur italianë.

“Puna e bërë nga viti 2020 deri më sot ka qenë kolosale për këtë urë dhe për gjithë kompletimin e Rrugës së Kombit”, tha ajo.

Ura e Madhe e Kukësit mbi lumin Drin ka një gjatësi totale prej 310 metra, ndërsa harku metalik ka një bazë prej 270 metra, një lartësi prej 56 metra.

Ura ka 4 korsi, në dy kahet e lëvizjes me ndarës trafiku të ndërmjetëm dhe me kavo çeliku që fiksohen nga bazamenti në harkun e urës. /Telegrafi/