Guri: Synoj shënimin e 15 golave në kampionatin belg

Rrugëtimi i ri i Sindrit Gurit me Ostenden nisi në mënyrën më të mirë të mundshme pas dy golave të shënuar në miqësoren kundër Zevezeles.

Për shkodranin ishte mjaft e rëndësishme që të krijonte një përshtypje pozitive tek tifozët dhe stafi teknik.

“Edhe pse nuk ishte ndonjë ndeshje e rëndësishme, u mundova të jap më të mirën. Jam bashkuar me skuadrën vetëm në datë 25 dhe u përpoqa të jap më të mirën dhe për fat të mirë, ia dola që të shënoj edhe dy gola, që ishin mjaft të rëndësishëm, pasi sollën përmbysjen e rezultatit dhe fitoren tonë”, deklaroi Guri.

Çdo futbollist e ka një objektiv personal dhe synimi i 24-vjeçarit është realizimi i 15 golave, një mision i vështirë por jo i paarritshëm për ish lojtarin e Kukësit.

“Natyrisht që çdo njeri i vë objektiva vetes dhe unë kam si qëllim të arrij të shënoj të paktën 15 gola. Duke parë nivelin këtu, kam shumë besim se do ta arrij, natyrisht edhe me shumë punë”, deklaroi sulmuesi shkodran.

Guri ka vetëm 5 ditë në Belgjikë, por i ka bërë tej mase përshtypje dashuria e tifozëve për skuadrën.

“Janë shumë të pasionuar pas futbollit, pas ekipit të Oostendes. Kjo është gjë e mirë, sepse futbolli luhet për tifozë dhe duhet të ndjehemi mjaft mirë, unë dhe e gjithë skuadra”, tha sulmuesi.

Ftesa në kombëtare ishte një nga çastet më të veçanta në karrierë, sulmuesi shpreson që kontributi i tij tek kuqezinjtë të vijojë edhe në të ardhmen.

“Shpresoj gjithmonë të jem pjesë e kombëtares dhe do mundohem të jap gjithmonë më të mirën. Për Shqipërinë jam gjithmonë i disponueshëm dhe gjithmonë i gatshëm për të dhënë më të mirën, por shpresoj që ftesa të mos më mungojë”, deklaroi Guri