Gudjonsen: Ndeshja ndaj Anglisë për ne është historike

Askush nuk do ta kishte besuar që Islanda, një vend me pak më shumë se 300 mijë banorë, do të kalonte fazën e grupeve të evropianit për t’u përballur në 1/8 at me Anglinë.

Fati deshi që këtë emocion ta përjetonte një nga emrat më të mëdhenj të futbollit islandez, Eidur Gudjonsen, i cili sheh një lidhje të ngushte mes futbollit të dy vendeve.

“Për ne përballja me Anglinë është e veçantë, sepse futbolli anglez ka patur një ndikim shumë të madh tek ne. Çdo islandez në të gjitha brezat ka qenë tifoz i një skuadre angleze. Prandaj unë shoh një lidhje të ngushte me futbollin anglez. Gjëja më e rëndësishme për në është fakti që kemi kaluar grupin.”

Sulmuesi 37-vjeçar në karrierën e tij ka luajtur me skuadra të ndryshme në Premier League, ku kulmin e ka pasur me Chelsean në sezonet 2000 -2006. Ai zbulon se ka marrë edhe një mesazh nga ish-shoku i skuadrës te blutë e Londrës, Frank Lampard, transmeton SS.

“Vetëm Frank Lampard më ka dërguar një mesazh duke qeshur…për faktin se do të përballeshim në 1/8 at me Anglinë. Nuk e di në të vërtetë se çfarë ka dashur të më thotë.

Islanda është shembulli më i qartë se në futboll e pamundura nuk ekziston. Edhe një skuadër e vogël, por me shumë dëshirë për të spikatur në futbollin elitar, mund t’ia dalë mbanë.

“Gjatë dy viteve të fundit çdo ndeshje ndërkombëtare që kemi luajtur e kemi menduar si sfidën më të madhe të historisë së futbollit tonë. Dhe tani kemi arritur në këtë moment historik. Me Anglinë do të jetë sërish ndeshja më e madhe e historisë së futbollit tonë. Në futboll gjithçka është e mundur. Jemi realistë për mundësitë tona dhe për faktin se mund të jemi nënvlerësuar, por do të bëjmë të pamundurën për të qëndruar në Evropian.