Gostivari fiton derbin me Shkëndijën dhe merr kreun e tabelës

Java e shtatë e Ligës së Parë të Maqedonisë së Veriut solli tre përballje të ekipeve shqiptare, ndërsa derbin e Pollogut të luajtur në Shkup e fitoi Gostivari, kështu tani ka marrë kreun e tabelë,s pasi mundi Shkëndijën me rezultat 3-1, njofton Telegrafi.

Java e shtatë e luajtur këtë të mërkure solli përballje interesante duke vënë përballë mes vete ekipet shqiptarë. Më interesant pritej të jetë në lagjen Maxhari në Shkup, ku Gostivari ishte nikoqir i Shkëndijës, që ishte lider prej javësh në renditje.

Por Gostivari shfrytëzoi momentin e saj me dy gabime të portierit Astri Amzai i cili në dy raste pothuajse u dhuroi golat kundërshtarëve. Fillimisht në minutën e 22-të duke dashur të pasoj te bashkë lojtari i tij, gaboi dhe këtë më së miri e shfrytëzoi Oguzhan Aydogan, ndërsa njejtë bëri edhe në pjesën e dytë ku në zonën e rreptësisë përsëri luajti me top dhe këtë rast e shfrytëzoi Marko Simonovski për të shënuar golin e dytë. Katër minuta para se të mbyllet ndeshja, Besart Ibraimi arriti që të ngushtojë rezultatin për Shkëndijën në 2-1. Kur pritej që Shkëndija të kërkojë barazimin, nga një kundërsulm i Gostivarit, portieri i kuqezinjve Amzai shkaktoi ndërhyrje të palejuar në zonën e gjashtëmbëdhjetë metërshit për penalti, të cilën në gol e realizoi Aldair dhe ky doli të jetë rezultati përfundimtar. Krejt në kohën shtesë u dha edhe një karton i kuq (dy të verdhë) për Elvis Mashike, por që epërsia me një lojtar më shumë nuk ndikoi në rezultatin përfundimtar 3-1

Duel tjetër mjaft interesant u luajt edhe në stadiumin e Çairit, ku ekipi i Shkupit priti Besën e Dobërdollit, ndërsa ekipi nga Çairi ishte favorit absolut i kësaj përballjeje. Shkupi kaloi në epërsi në minutën e 24 me anë të Edmundsson, ndërsa gjatë gjithë ndeshjes krijoi edhe shumë raste të tjera por që nuk arritën ti realizojnë. Në pjesën e dytë Besa arriti që të barazoj rezultatin krejt pak para fundit, në minutën e 88-të, ishte Ali Hisar që shënoi gol për barazim 1-1 dhe rezultat përfundimtar.

Në qytetin e Ohrit përballje kishin dy fqinjët, Voska nikoqire dhe Struga, ndeshje kjo që kishte mjaft dinamik dhe prodhoi dy gola. Të parët në epërsi kaluan nikoqirët në minutën 50-të me autor Jahjan, ndërsa Struga arriti të barazojë në të 67-tën me Radeskin.

Në dy ndeshjet tjera Brera – Tikveshi dhe Pelister – Rabotniçki, nuk pati fitues dhe ndeshjet u mbyllën me rezultatin identik 0-0. /Telegrafi/