Gjini: Edhe partitë e tjera besojnë se Haradinaj është i duhuri për president

Nënkryetari i parë i AAK-së, Ardian Gjini, beson që kreu i partisë së tij, Ramush Haradinaj, do të jetë president i ardhshëm i Kosovës. Ai thotë se Haradinaj është kandidati më i denjë për këtë post dhe se këtë mendim e ndajnë edhe të tjerët jashtë Aleancës. Gjini thotë se në zgjedhjet e ardhshme që pritet të mbahen në fillim të vitit do të garojnë të vetëm.

Kryetari i Aleancës në Gjakovë në intervistën për KosovaPress thotë se edhe në mesin e qytetarëve dhe në partitë e tjera është bindja se Ramush Haradinaj do të ishte gardian i Kushtetutës si president i Kosovës.

“Aleanca beson që kryetari Haradinaj do të jetë president i ardhshëm i Kosovës. Nuk kemi vetëm arsye subjektive që mendojmë ashtu shumica prej nesh, por besoj që ka dhe shumë qytetarë të tjerë ose edhe në parti të tjera besojnë që Ramush Haradinaj do të ishte gardian i kushtetutshmërisë si kreu i shtetit të Kosovës. Ne jemi të sigurt që në këtë fazë Kosova nuk mund të ketë një kandidat të denjë për atë pozitë dhe kjo është arsyeja pse ne besojmë fuqishëm dhe insistojmë që kjo të ndodhë. Ne duhet të shkojmë në zgjedhje dhe duhet të punojmë që me dalë sa më mirë, dhe gjasat janë reale që të dalim mirë, por jemi duke hyrë në garë dhe kur hyjmë në garë hapen opsionet dhe hapen letrat”, deklaroi Gjini.

Kryetari i Komunës së Gjakovës nuk beson se Aleanca do të jetë para një situate ku do të duhet të heqë dorë nga posti i presidentit vetëm për të qenë pjesë e qeverisë së ardhshme që do të dalë pas zgjedhjeve.

“Nuk besoj që do të jemi në rrethana të tilla (të heqim dorë nga presidenti për të qenë pjesë e qeverisë), nuk besoj që do të dalim në rrethana të tilla. Patjetër që janë situata të ndryshme, por nuk besoj që duhet të zgjedhim. Ne do të insistojmë që t’ia japim Kosovës një president i cili i bën nder dhe i cili do të jetë gardian, mburojë e kushtetutshmërisë, ligjit dhe funksionimit të shtetit të Kosovës”, vijoi ai.

Nënkryetari i AAK-së, Ardian Gjini, në intervistën dhënë për KosovaPress flet edhe për zgjedhjet e parakohshme që pritet të mbahen në fillim të vitit të ardhshëm.

Gjini thotë se Aleanca është e gatshme të hyjë e vetme në zgjedhje por duke i lënë derën e hapur partive më të vogla që duan të bëhen pjesë e listës së AAK-së.

“Ashtu siç qëndrojnë punët tani ne jemi të gatshëm të shkojmë vetëm, nuk di nëse në ditët që vijnë do të ketë afrim të ndonjë partie më të vogël që dëshiron të ketë koalicion. E ka thënë edhe kryetari Haradinaj që ne jemi të hapur, por besojmë që kësaj radhe kryesisht duhet të fokusohemi në fuqinë e Aleancës.

Së fundmi kanë qarkulluar zëra se Aleanca mund të ketë një koalicion me ndonjërin nga tri partitë e tjera më të mëdha si Lëvizja Vetëvendosje, Lidhja Demokratike e Kosovës dhe Partinë Demokratike të Kosovës.

Mirëpo, Gjini thotë se nuk beson se do të ketë koalicione parazgjedhore mes katër partive më të mëdha parlamentare.

“Nuk besoj që do të ketë koalicione të katër partive të mëdha parazgjedhore, nuk besoj që një gjë e tillë do të ndodhë… Pas zgjedhjeve duhet të shohim, por koalicione parazgjedhore mes katër partive kryesore nuk besoj që do të ketë. Aleanca nuk është e gatshme të bëjë një gjë të tillë”, deklaroi Gjini.

Votuesit kosovarë do t’i drejtohen kutive të votimit në fillim të vitit të ardhshëm pas vendimit të Gjykatës Kushtetuese që doli me vendim se vota e deputetit Ethem Arifi që ishte vendimtare për Qeverinë Hoti është e pavlefshme pasi në momentin e votimit ai ishte shpallur fajtor nga gjykata për mashtrim me subvencione./Telegrafi/