Gjermania i kërkon Rusisë të parandalojë garën në armatim

Ministri i Jashtëm i Gjermanisë, Heiko Maas, i bëri thirrje Rusisë që të ndihmojë në parandalimin e garës në armatim, duke e ruajtur një marrëveshje të rëndësishme për këtë çështje me Shtetet e Bashkuara.

Duke folur gjatë një vizite në Moskë, përcjell rel, Maas kërkoi nga Rusia që të shkatërrojë një lloj rakete për të cilën Uashingtoni thotë se e shkel marrëveshjen.

Vitin e kaluar, presidenti i Shteteve të Bashkuara, Donald Trump, ka thënë se SHBA-ja do të tërhiqet nga Traktati i Forcave Bërthamore me Rreze të Mesme, për shkak të shkeljeve të Rusisë.

Duke reaguar ndaj deklaratave të Maasit, ministri i Jashtëm rus, Sergei Lavrov, tha se Moska nuk e ka shkelur traktatin e vitit 1987.

Lavrov tha se zyrtarët amerikanë e kanë njoftuar Rusinë se vendimi i tyre është përfundimtar dhe se nuk është i hapur për negociata.

Uashingtoni ka thënë se do të dalë nga marrëveshja në fillim të shkurtit nëse Moska nuk i ndalon shkeljet.

Rusia e mohon se raketa në fjalë, 9M729, e shkel Traktatin e Forcave Bërthamore me Rreze të Mesme.