Gjermanët duan të jenë të parët – kur do ta kalojë Volkswagen Teslan?

Volkswagen dëshiron të bëhet prodhuesi më i madh në botë i veturave elektrike deri në vitin 2025.

Gjiganti gjerman i automjeteve kohët e fundit prezantoi strategjinë e tij për periudhën e ardhshme dhe njoftoi se pret që deri në vitin 2030, gjysma e automjeteve të shitura në tregun botëror të jenë vetura elektrike me bateri.

Para se të ndodhë kjo, Volkswagen dëshiron të kapërcejë Teslan deri në vitin 2025 dhe të bëhet prodhuesi më i madh në botë i automjeteve elektrike, raporton Reuters.

Ky vlerësim është mjaft optimist, nëse dihet se në vitin 2020, veturat elektrike kishin shitje vetëm 3 për qind, nga shitja e të gjitha veturave në botë.

“Ne kemi vendosur një qëllim strategjik për t’u bërë një udhëheqës botëror në tregun e automjeteve elektrike – dhe jemi në rrugën tonë për ta bërë këtë”, tha CEO i Grupit VW Herbert Dis, duke njoftuar planin e produktit të kompanisë për dekadën e ardhshme.

Një vështrim në të ardhmen tregon se Grupi VW dëshiron që shumica e automjeteve të saj në të gjitha tregjet kryesore të jenë me emision zero deri në vitin 2040, ndërsa vetë kompania përpiqet të jetë neutral ndaj klimës deri në vitin 2050.

Për të arritur këtë, të gjitha automjetet në grup do të duhet të kalojnë në një platformë mekanike për veturat e elektrizuara, ndërsa platformat e përdorura nga modelet me motorë SUS ​​do të hiqen nga përdorimi.

Grupi gjerman po investon shumë në bateri dhe do të paraqesë një dizajn unik të baterive lëvizëse për automjete elektrike që do të ulë kostot me 50 për qind në krahasim me nivelin aktual. Ky lloj baterie do të prodhohet në gjashtë fabrika në të gjithë Evropën. /Telegrafi/