Rusia sot filloi sulmet ushtarake në Ukrainë, duke u futur nga jugu, lindja dhe veriu – si nga ajri ashtu dhe toka.
Raketa e bomba të ndryshme janë parë duke fluturuar nëpër qiell – e tanket dridhnin gjithçka derisa po kalonin, transmeton Telegrafi.
Helikopterët vazhdimisht hidhnin raketa, e një gjë e tillë është aprovuar me bekimin e presidentit rus Vladimir Putin.
Deri më tani raportohet për dhjetëra të vdekur nga të dyja palët, e më së keqi po e pësojnë civilët nga sulmet e pandërprera nga ushtria ruse.
Kujtojmë sesi mbi 200 mijë trupa ruse prej javësh janë stacionuar përgjatë kufirit me Ukrainën, madje disa prej tyre kanë qëndruar në Bjellorusi nga ku edhe janë futur sot.
E nëpër rrjete sociale dhe agjenci ndërkombëtare të lajmeve, tashmë janë publikuar imazhe dhe video të ndryshme ku shfaqin pasojat e këtyre sulmeve të përgjakshme.
Pamjet tregojnë tmerrin – objekte të rrënuara, gjak nëpër rrugë, civilë të vrarë si dhe mijëra banorë të strehuar nëpër bunkerë të improvizuar.
Madje në disa pjesë të Kievit janë vërejtur kolona të gjata të veturave duke u larguar nga kryeqyteti ukrainas – në kërkim të një zone më të sigurtë. /Telegrafi/
