Giresse: Ndaj Greqisë nuk është përcaktuese – kemi shumë mungesa, por duhet të luajë mirë për Kosovën ai që luan

Përzgjedhësi i Kosovës, Alain Giresse, ka folur në konferencë për media para ndeshjes me Greqinë, duke u ndal te përballja dhe mungesat.

Francezi ka thënë se ndeshja ndaj Greqisë nuk është përcaktuese për vendin e parë në grup, edhe pse një fitore eventuale e grekëve do ta rriste diferencën në gjashtë pikë dhe shpresat do të zbeheshin dukshëm për ta fituar grupin.

Por Giresse nuk dorëzohet dhe kërkon fitore në këtë përballje.

“Është një ndeshje e vështirë dhe Greqia është një kundërshtar i fortë. Nuk mund të them se kjo ndeshje është një finale, por patjetër që është një ndeshje e madhe. Dhe një fitore eventuale në këtë takim sigurisht që do të rriste ambiciet tona ta fitojmë grupin”, ka thënë Giresse.

Ai është ankuar se do të ketë shumë mungesa për duelin vendimtar ndaj Greqisë, por ka shtuar se obligim i të gjithëve është që ta përfaqësojnë Kosovën sa më mirë që është e mundshme.

“Deri më tani kemi pasur shumë probleme me lëndime e suspendime. Megjithatë, duhet të vazhdojmë dhe të tregojmë lojë të mirë në ndeshjen e së dielës. Kemi pasur probleme por shpresoj të mos i kemi në ndeshjet tjera të radhës”.

“Ne jemi këtu me këtë numër të futbollistëve që kemi. E kemi obligim që ta përfaqësojmë Kosovën në mënyrën më të mirë të mundshme me këtë grup të lojtarëve që kemi në dispozicion”, ka thënë Giresse.

Betim Fazliji, Lirim Kastrati dhe Ibrahim Dreshevic do të mungojnë shkaku kartonëve të marrë në ndeshjen e para.  Edon Zhegrova mungon shkaku i lëndimit.

Giresse ka thënë se nëse ftohen më shumë se 23 apo 24 lojtarë, mund të sjell probleme në skuadër, pasi shumë duhet të përfundojnë në tribuna.

Lexo po ashtu Rashica kërkon fitoren në Greqi: Është ndeshja e fundit për qershor, mund të përcaktojë gjithçka

“Kemi mungesa të mëdha dhe shumë të rëndësishme për ne. Ata nuk janë me ekipin dhe nuk mund t’i përdorim. E rëndësishme është që ta komponojmë një ekip me këta futbollistë që i kemi dhe të arrijmë të marrim rezultat pozitiv”.

“Dua të them që të gjitha ekipet kanë pas 23 apo 24 futbollist sikurse ne. Nga ky kontingjent kemi përdorur 17 futbollistë dhe gjatë këtij grumbulli ne kemi pasur probleme, jo vetëm me lëndimet, por edhe me suspendimet dhe nuk ka qenë e lehtë të zëvendësohen futbollistët që kanë munguar”.

“Nëse flasim për lëndimet dhe mungesat eventuale është normale që të ftohen lojtarët e rinj pasi do të kenë kohë të stërviten me ekipin. Por nëse flasim për të ftuar 30 lojtarë, kjo mund të krijoj problem pasi disa lojtarë mund të përfundojnë në tribuna dhe kjo mund të sjell probleme në ekip”, ka thënë ai. /Telegrafi/