Vërshimet, FSK evakuon banorët e fshatit Drejë të Istogut

Rreth 30 persona janë në pritje për evakuim në fshatin Drejë të Istogut derisa 30 të tjerë tashmë janë evakuuar nga ekipet e kërkim shpëtimit të Forcës së Sigurisë së Kosovës në bashkëpunim me ekipet e emergjencës dhe zjarrfikësit në këtë komunë.

Banorët të cilët kishin qëndruar të bllokuar në shtëpitë e tyre gjatë gjithë ditës për shkak të vërshimeve, janë dërguar në spitalin e Istogut për strehim, disa prej tyre tek të afërmit, ka thënë Xhevat Demaj, drejtor i Emergjencave në Komunën e Istogut.

Ai ka bërë te ditur se janë edhe shtatë familje të cilat duhet te evakuohen në këtë fshat, njofton KP.

Lexo po ashtu Qytetarët heronj, shpëtojnë një çift të moshuar pas përmbytjeve në Skënderaj

“32 sa i tërhekëm, jemi duke i dërguar në Istog, kthehen FSK, do të intervenojmë edhe njëherë ka gjasa që të jenë edhe 30 persona”, ka thënë ai.

Derisa për fshatrat e tjera të kësaj komune, Demaj ka thënë se gjendja është stabile.

“Porsa u informova që gjendja nëpër fshatra të tjera që e kemi pas, në ato tetë fshatra, ka rënë niveli i ujit, nuk është diçka më rrezik më shumë, pritet tash tërë natën të shohim shiu çka po bën, inshallah nuk bie shumë, por momentalisht është situata e qetësuar”, ka shtuar ai.

Lexo po ashtu MPB ngrit gatishmërinë shtetërore pas përmbytjeve: Aktivizohen qendrat operative në të gjitha komunat e vendit

Rreth 14 familje kishin mbetur të bllokuara në Drejë të Istogut gjatë gjithë ditës si pasojë e vërshimeve nga reshjet e mëdha të shiut.

Ndërsa dy të tjera ishin larguar gjatë ditës nga shtëpitë e tyre meqë uji u kishte depërtuar brenda.