Fshesë në MASHT, ndërrohen 30 drejtorë e udhëheqës në ministri

Rreth 30 drejtorë të departamenteve dhe udhëheqës të divizioneve të Ministrisë së Arsimit, Shkencës dhe Teknologjisë (MAShT), gjatë javës së kaluar janë zëvendësuar me ushtrues detyre.

Këtë vendim e ka marrë sekretari i MAShT-it, Ekrem Kastrati, i cili për Kallxo.com tha se kjo është bërë në kuadër të reformave brenda këaj ministrie.

“Ky vendim është në bazë të një rregullore për standarizimin dhe rregullimin e ministrisë së Arsimit Shkencës dhe  Teknologjisë që është miratuar nga Qeveria e Kosovës. Jemi në fazën fillestare të implementimit të kësaj rregullore dhe ky është bashkëpunim mes ministrisë sonë, Bashkimit Europian dhe GIZ-it”, tha ai.

Lidhur me këtë vendim, drejtorët e këtyre departamenteve gjatë ditës së djeshme kanë protesutar për t’i shprehur pakënaqësitë për degradimin nga pozitat që mbanin.

Por ishte, Zyra e Bashkimit Evropian në Kosovë që reagoi menjëherë pas kësaj duke thënë se e mirëpret vendimin e këtij organizimit të ri të MASHT-it.

“BE mirëpret miratimin e organizimit të ri të MASHT-it dhe përgëzon ministrin, Shyqyri Bytyqi për vendimin e tij të shpejtë për ta zbatuar atë. Shpresojmë që reforma të vazhdojë dhe të sjellë rezultate pozitive duke parandaluar vonesa të mëtejshme në përpjekjet e Kosovës për të përmirësuar cilësinë e arsimit”, është thënë në shkrimin e tyre në profilin zyrtar në Twitter.

Kjo rregullore për organizimin e instuticionit të MAShT-it është miratuar më 11 shtator nga Qeveria dhe është bazuar në dokumentin “Rishikimi funksional i MASHT-it”, i financuar nga BE-ja dhe GIZ-i.