Gjenerali Sven Lange merr drejtimin e Ekipit Këshillues dhe Lidhës të NATO-s në Kosovë

Brigadieri gjerman Sven Lange ka marrë sot zyrtarisht drejtimin e Ekipit Këshillues dhe Lidhës të NATO-s (NALT) në Kosovë, gjatë një ceremonie të ndërrimit të komandës.

Ai pason Brigadierin Christian Nawrat, i cili ka udhëhequr NALT që nga prilli i vitit 2024.

Gjatë ceremonisë, gjeneral Nawrat vlerësoi përvojën e tij në Kosovë.

“Nëse dëshiron të japësh këshilla të mira, fillimisht duhet të mësosh vetë. Dhe ka shumë për të mësuar në Kosovë. Gjatë këtij viti, kam pasur mundësinë të njoh më mirë organizatat e sigurisë në Kosovë, por edhe më gjerë. Për këtë, jam thellësisht mirënjohës”, ka deklaruar ai.

Në fjalën e tij të parë si drejtor i ri i NALT, Brigadier Sven Lange shprehu mirënjohje për punën e paraardhësit të tij dhe theksoi përkushtimin për të vazhduar mbështetjen e NATO-s ndaj institucioneve të sigurisë në Kosovë.

“Jam i bindur se emërimi i një drejtori të ri sjell perspektiva të freskëta dhe udhëheqje të re, duke ruajtur objektivat thelbësore të kësaj misioni të rëndësishëm”, deklaroi ai.

Gjeneral Lange ka një karrierë të spikatur në ushtrinë gjermane, ku ka shërbyer në pozita drejtuese në Kolegjin e Komandës dhe Shtabit të Gjermanisë, Ministrinë Federale të Mbrojtjes dhe selinë e NATO-s.

Që nga gushti i vitit 2016, NALT ka pasur për mision ofrimin e mbështetjes për ndërtimin e kapaciteteve të organizatave të sigurisë në Kosovë, përfshirë Forcën e Sigurisë së Kosovës, brenda mandatit të saj fillestar për mbrojtjen civile./Telegrafi/