Florian Kamberi ka kaluar te Aberdeeni

Florian Kamberi ndryshon sërish skuadër. Sulmuesi i Kombëtares shqiptare largohet nga St Gallen pas vetëm gjysmë sezoni, për t’u rikthyer në Skoci, këtë herë me fanellën e Aberdeenit. 25-vjeçari duket se nuk ka mundur të përshtatet te skuadra zvicerane, me të cilën kishte firmosur kontratë trevjeçare.

Palët kanë rënë dakord që Kamberi të huazohet deri në fund të sezonit tek Aberdeeni, ku do të ketë mundësi të luajë në vazhdimësi. Sulmuesi shqiptar madje mund të debutojë që të shtunën në “Easter Road”, pikërisht ndaj ish-skuadrës së tij, Hibernian.

Kamberi e filloi karrierën e tij profesionale në ekipin zviceran, Grasshoppers, dhe përfaqësoi Zvicrën në nivelin nën 21 vjeç, përpara se të bashkohej me Hibs në Ligën Premier të Skocisë në vitin 2018 – transmeton SuperSport.

Shqiptari befasoi me paraqitjet e tij, duke i bindur shumë shpejt drejtuesit e klubit për të blerë kartonin e tij. Kalimi te Rangers, në formë huazimi në fillim të vitit të kaluar i zemëroi tifozët e Hibs (Kamberi deklaroi se kalimi te Rangers ishte ëndërr për të). Ai u kthye gjatë verës në Zvicër, por pa mundur të jetë pikë referimi në sulmin e St Gallen.

Duke komentuar afrimin e Kamberit, trajneri i Aberdeenit, Derek McInnes, tha se ishte i kënaqur që do të kishte një sulmues të tretë në skuadrën e tij,

“Jam i kënaqur, pasi do të kem më shumë alternativa në sulm. Floriani i ka treguar cilësitë e tij në kampionatin tonë. Ai duket entuziast për kthimin në Skoci, ka cilësi dhe përvojë në këtë ligë. Mendoj se do të ketë ndikim pozitiv tek ne deri në fund të sezonit”, ka thënë ai.

🔴 We can tonight confirm the loan signing of striker Florian Kamberi from Swiss Super League side, St Gallen, pending international clearance. #StandFree

— Aberdeen FC (@AberdeenFC) February 1, 2021