Evropa Lindore në fokus të investitorëve

Vendet Evropiano-Lindore janë në gjendje ta administrojnë mirë krizën. Por për këtë është e nevojshme që qeveritë e këtyre vendeve, sa më shpejt të marrin masat e duhura dhe të miratojnë paketa financiare të ngjashme me ato në vendet perëndimore, tha Elena Kirtscheva, sekretare e përgjithshme e Forumit Ekonomik të Vjenës për vendet e Evropës Juglindore.

Të gjitha temat u trajtuan në sfondin e krizës financiare. Kjo vlen jo vetëm për investimet apo mbështetjen nga BE-ja por edhe për institucionet ndërkombëtare financiare. Edhe politika e energjisë apo telekomunikacioni janë të lidhura ngushtë me të.

Në shumë prej vendeve të Evropës Juglindore vala e madhe e privatizimeve ka përfunduar, por falë normave të rritjes ekonomike që janë më të larta se mesatarja perëndimore ato vazhdojnë të mbeten tërheqëse për investimet direkte.

Në kuadër të krizës që ka goditur fort vendet e industrializuara, ekziston megjithatë rreziku që këto investime të ndërpriten, tha Kirtscheva.

Po ajo shprehu optimizëm se, investimet në Evropën Juglindore do të vazhdojnë. "Në konferencat e Forumit Ekonomik të Vjenës, synimi kryesor është realizimi i kontakteve direkte mes investuesve dhe përfaqësuesve të vendeve të Lindjes”.

Që prej themelimit pesë vjet me parë, Forumi Ekonomik i Vjenës është zhvilluar në një platformë të dobishme për takime, shkëmbime mendimesh dhe përvojash dhe mbështetje të projekteve në rajonin e Evropës Juglindore si pjese e një Evrope të bashkuar.

Megjithëse ritmet e zhvillimit në vendet e ish bllokut komunist, janë të ndryshme, ekonomia është gjithnjë një hap përpara politikës dhe këtë e tregoi dhe interesi i madh për sesionin e peste të Forumit të Vjenës.

Me shumë se 500 pjesëmarrës nga rreth 37 vende u përshëndetën nga Presidenti i Forumit Erhard Busek dhe nga sekretarja e përgjithshme e Forumit, Elena Kirtscheva.