Gjykata e lartë turke mbështet daljen nga traktati kyç që mbron gratë

Turqia nënshkroi Konventën e Stambollit për mbrojtjen e grave nga abuzimi në familje në vitin 2011.

Këshilli i Shtetit i Turqisë vendosi të martën se presidenti turk, Recep Tayyip Erdogan kishte të drejtë të anulonte në mënyrë të njëanshme anëtarësimin e vendit në Konventën e Stambollit kundër dhunës me bazë gjinore.

Ankaraja u tërhoq nga konventa evropiane që mbronte gratë nga abuzimi në familje me një dekret brenda natës korrikun e kaluar, pavarësisht se Turqia ishte vendi i parë që e nënshkroi atë në vitin 2011. Masa u kritikua gjerësisht nga grupet e të drejtave të njeriut dhe zyrtarët perëndimorë.

Kundërshtarët e të parit të shtetit turk argumentuan se ai nuk kishte fuqi ligjore për të anuluar anëtarësimin, raporton aljazeera.

🟣Council of State rejects the annulment request of #Turkey’s withdrawal from Istanbul Convention

➡️https://t.co/7Ug8rZTwF9 pic.twitter.com/rUV0nWQ3hj

— GercekNews (@newsgercek) July 19, 2022

Megjithatë, gjykata më e lartë e vendit nxori një vendim prej 40 faqesh duke hedhur poshtë një kërkesë për të rrëzuar vendimin e presidentit.

“Është e tmerrshme nga një këndvështrim ligjor”, u citua të thoshte Ipek Bozkurt, një avokate që përfaqëson organizatën e të drejtave “Ne do të Ndalojmë”. “Ky vendim i gabuar duhej të ndalohej nga gjykata”, shtoi ajo.

Dokumenti, i cili u nënshkrua nga 46 vende dhe Bashkimi Evropian, kërkon që shtetet anëtare të miratojnë legjislacionin e brendshëm për parandalimin e dhunës ndaj grave.

Qeveria konservatore e Erdoganit u akuzua për goditjen e të drejtave të grave dhe shtypjen e komunitetit LGBT+ me dhjetëra njerëz të arrestuar në marshimet e Krenarisë në Stamboll dhe Ankara, pavarësisht se homoseksualiteti nuk ishte i ndaluar ligjërisht në Turqi. /Telegrafi/