“Epoka e Haaland” vetëm ka filluar, numrat e tij lënë pas edhe emrat më të mëdhenj që ka njohur bota e futbollit

Erling Haaland shënoi dy gola të tjerë në Ligën e Kampionëve të mërkurën në mbrëmje kundër Club Brugge për ta rritur edhe më tutje reputacionin e tij që është në zhvillim e sipër.

Të raportosh se ka shënuar gol norvegjezi është bërë pothuajse e natyrshme në dy vitet e fundit.

Në të vërtetë, me këto dy gola ai ka shkuar në kuotën e 54 golave në vetëm 50 ndeshje, një rekord i mrekullueshëm për një sulmues i cili është ende vetëm 20 vjeç.

E gjitha kjo tregon se tashmë ne jemi futur në Epokën e Haaland’.

Këtë e thonë shumë njerëz pasi numrat e tij janë të jashtëzakonshëm, ndërsa edhe veprimet në fushë, vetëm sa shkojnë e rriten.

Ai tashmë kishte bërë emër sa ishte te Red Bull Salzburg në Austri para se të kalonte në Borussia Dortmund, ku kishte shënuar 29 herë në vetëm 27 paraqitje.

Nëse shumë pretendonin se Haaland po i bënte golat vetëm se luante në një ligë të dobët si ajo austriake, atëherë paraqitjet e tij në Ligën e Kampionëve rrëzojnë këtë teori, pasi kishte shënuar tetë gola në gjashtë ndeshje.

Sidoqoftë kishte shumë dyshime kur ai u bashkua me Borussia Dortmundin, por ato u zhdukën menjëherë pasi ai shënoi një het-trik në debutimin e tij kundër Augsburg për vetëm 34 minuta.

Haaland ka shkelur gjithçka në rrugën e tij që nga ajo kohë, me 26 gola në 28 ndeshje në kampionat.

Edhe në Evropë ai është mirë, duke shënuar 14 gola në 11 ndeshje deri më tani – përfshirë katër në tri ndeshje këtë sezon.

Ai është duke thyer rekorde çdo ditë që shkon, duke arritur këtë numër të golave ​​evropianë më shpejt se kushdo në histori, duke përfshirë edhe emra si Harry Kane, Robert Lewandowski, Ruud van Nistelrooy dhe Cristiano Ronaldo, këtij të fundit i duheshin 51 ndeshje për të arritur 14 gola.

Me këto 14 gola, ai ka shënuar më shumë sesa kanë bërë ndonjëherë në këtë garë emra si Carlos Tevez, Michael Oëen, Radamel Falcao dhe Diego Costa.

Përsëri, t’ua kujtojmë – ai është vetëm 20 vjeç. Si rezultat, të gjitha klubet kryesore të Evropës i kanë sytë drejt tij.

Në varësi të zhvillimit të tij, Haaland mund të kthehet në një nga qendër-sulmuesit më të mirë që ka parë futbolli.

Gjithçka duket e lehtë për gjigandin norvegjez dhe epoka e tij ka nisur nga tani. /Telegrafi/