Ëndrra e tij është të pranohet në akademinë ushtarake West Point, Trump ia kumton lajmin e gëzueshëm – i riu është brezi i katërt në familje që mban uniformën

Donald Trump gjatë fjalimit të tij në Kongres befasoi një nxënës të shkollës së mesme Jason Hartley, ëndrra më e madhe e të cilit është t’i bashkohet akademisë ushtarake në West Point, të cilit ia kumtoi lajmin se ai tashmë është pranuar.

Hartley kishte aplikuar muaj më parë dhe këtë lajm të gëzueshëm se është pranuar ia kumtoi vetë presidenti amerikan, i cili thuri lavde për të riun, transmeton Telegrafi.

“Sonte na është bashkuar një i ri, Jason Hartley, i cili e di peshën e asaj ‘detyra thërret’. Babai, gjyshi dhe stërgjyshi i Jasonit mbanin të gjithë uniformën. Jason humbi tragjikisht babanë e tij, i cili ishte gjithashtu zëvendës i Sherifit të Qarkut të Los Anxhelosit kur ishte shumë i vogël, dhe tani ai dëshiron të vazhdojë trashëgiminë e shërbimit familjar”, tha Trump para të pranishmëve në Kongres.

“Jason është një maturant në shkollë të mesme, një atlet i universitetit. Është vërtet sportist i mirë, thonë ata, një student i shkëlqyer me një notë 4.46 që është notë e mirë dhe ëndrra e tij më e madhe është të marrë pjesë në Akademinë Ushtarake të SHBA në West Point dhe Jason, kjo është një punë shumë e madhe për të hyrë”, vazhdoi presidenti amerikan.

“Është e vështirë për t’u futur, por kam kënaqësinë t’ju informoj se aplikimi juaj është pranuar”, tha për fund Trump duke lënë gojëhapur të riun i cili gjithmonë kishte ëndërruar të jetë pjesë e kësaj akademie ushtarake. /Telegrafi/