Stephan El Shaarawy ka ndërruar mendje dhe do të transferohet në kampionatin kinez.
Pasi fillimisht i kishte thënë ‘jo’ klubit kinez Shanghai Shenhua, tani italiani ka ndërruar mendje.
Sky Sports ka raportuar se futbollisti italian ka pranuar të transferohet te Shanghai Shenhua gjatë këtij afati kalimtar veror.
26-vjeçari është pajtuar të nënshkruaj me skuadrën kineze një kontratë tre vjeçare ku do të ketë një pagë jashtëzakonisht të lartë.
Paga e El Shaarawyt te Shanghai do të jetë 15 milionë euro në vit.
Kësisoj reprezentuesi italian për vetëm një vit në Kinë do të fitojë më shumë se sa ka fituar në tri vite e gjysmë qëndrim te Roma.
Paga aktuale e lojtarit te Roma ishte dy milionë euro, por me disa bonuse arrinte 2,5 milionë në vit.
Për tri vite qëndrim në Kinë, anësori do të fitojë 45 milionë euro.
Roma në anën tjetër nga shitja e yllit të tyre do të arkëtoj rreth 30 milionë. /Telegrafi/