Ekipi i Trumpit niset drejt Arabisë Saudite për të filluar bisedimet e paqes Rusi-Ukrainë

Dy zyrtarë të lartë amerikanë po udhëtojnë për në Arabinë Saudite për të nisur negociatat e paqes midis Rusisë dhe Ukrainës.

Dy burime të njohura me këtë çështje njoftuan se këshilltari i sigurisë kombëtare Mike Waltz dhe i dërguari special Steve Witkoff janë rrugës për në Arabinë Saudite.

Bëhet e ditur se të mërkurën, presidenti amerikan Donald Trump tha se kishte pasur një marrëveshje për të filluar negociatat për përfundimin e luftës në Ukrainë, pas bisedave telefonike me Vladimir Putin dhe Volodymyr Zelensky, shkruan skynews, përcjell Telegrafi.

Pas thirrjes së tij me Putinin, Trump postoi në Truth Social duke thënë: “Ne të dy ramë dakord, ne duam të ndalojmë miliona vdekje që po ndodhin në luftën Rusi/Ukrainë”.

Një zëdhënës i Kremlinit tha se Putin dhe Trump kishin rënë dakord të takoheshin dhe presidenti rus e ftoi Trumpin të vizitonte Moskën.

Ndërsa presidenti i Ukrainës shkroi në X se ai kishte një “bisedë kuptimplotë” me telefon me Trumpin për të diskutuar “mundësitë për të arritur paqen”.

Ai më pas reagoi ndaj thirrjes së presidentit amerikan me Putinin duke thënë se çështja kryesore ishte “të mos lejohej që gjithçka të shkonte sipas planit të Putinit” – pasi presidenti i SHBA-së tha gjithashtu se nuk ka gjasa që Ukraina të rimarrë të gjithë tokën e saj të pushtuar.

Ndryshe, Trump u kishte thënë gazetarëve të Shtëpisë së Bardhë se nuk shihte asnjë mënyrë “që një vend në pozitën e Rusisë” mund të lejonte Ukrainën të anëtarësohej në NATO. /Telegrafi/