Ekipi pa humbje kundër ekipit pa fitore

Të premten fillon java e katërt e Superligës me ndeshjen ndërmjet Hajvalisë dhe Gjilanit. Skuadra prishtinase nuk e ka shijuar ende asnjë pikë dhe është në kërkim të pikëve të para, në duelin që do të zhvillohet në “Kizhnicë”.

“Ne do të hyjmë në fushë dhe do ta japim maksimumin nga vetja jonë në këtë ndeshje, sepse na duhen tri pikët”, u shpreh për “Zërin” mesfushori i Hajvalisë, Azem Ahmeti, i cili është i vetëdijshëm se skuadra e Ismet Munishit nuk do të ketë punë aspak të lehtë përballë Gjilanit, i cili nuk di për humbje në tri xhirot e para.

Në fakt, skuadra e Sadat Pajazitit ka regjistruar tri fitore në po aq ndeshje, duke kryesuar në tabelë. Prandaj, ekipi gjilanas shkon në Hajvalia për ta vazhduar serinë perfekte të rezultateve.

“Është ndeshje shumë e fortë, Hajvalia është në krizë rezultatesh, por ne do të shkojmë për t’i fituar pikët. Shpresoj të dalim me pikë të plota nga kjo ndeshje”, tha për gazetën mbrojtësi i djathtë i Gjilanit, Besnik Krasniqi.

Gjilani pas tri xhirove të para i prin tabelës me 9 pikë të plota, ndërsa Hajvalia pas tre ndeshjeve është e fundit në tabelë, që nuk ka tubuar asnjë edhe një pikë. Ndeshjet tjera të xhiros së katërt do të zhvillohen të shtunën dhe të dielën.

Superliga – Java e 4-t

E premte

Hajvalia – Gjilani (16:00)

E shtunë

Feronikeli – Drenica (14:30)

Istogu – Liria (16:00)

E diel

Vushtrria – Trepça ’89 (16:00)

Besa – Prishtina (16:00)

Llapi – Drita (16:00)