Edhe Prokuroria e cilëson të dyshimtë vdekjen e gruas në Prishtinë

Prokuroria Themelore në Prishtinë, njëjtë si Policia e Kosovës, e ka cilësuar të dyshimtë vdekjen e gruas që ndodhi këtë të mërkurën në lagjen “Bregu i Diellit” në kryeqytet.

Zëdhënësja e kësaj prokurorie, Laureta Ulaj, në një përgjigje me shkrim për Telegrafin ka thënë se në vendin e ngjarjes ndodhet prokurorja kujdestare e Departamentit të Krimeve të Rënda dhe njësitet e tjera relevante.

“Ju njoftojmë se prokurorja kujdestare nga Departamenti i Krimeve të Rënda ndodhet në vendin e ngjarjes me njësitë e tjera relevante. Është gjetur një trup pa shenja jete (femër). Sipas informatave fillestare nga vendi i ngjarjes, rasti ka të bëjë me vdekje në rrethana të dyshimta”, ka deklaruar Ulaj.

Tutje, ajo ka shtuar se Prokuroria në koordinim me të gjitha institucionet relevante janë duke i ndërmarrë veprimet e nevojshme hetimore për t’i ndriçuar të gjitha rrethanat e këtij rasti.

“Pas ekzaminimeve nga vendi i ngjarjes, trupi i pajetë do të dërgohet në IML për obduksion”, ka përfunduar Ulaj.

Ndërsa, zëdhënësja e Policisë së Kosovës për rajonin e Prishtinës, Flora Ahmeti, për Telegrafin ka thënë se vdekjen e viktimës e ka konstatuar ekipi mjekësor në vendin e ngjarjes.

“Rreth orës 13:00, kemi pranuar informatën për një person të lënduar, të shtrirë në afërsi të një objekti në rrugën “Ferat Dragaj” në Prishtinë. Policia dhe ekipi mjekësor menjëherë kanë dalë në vendin e ngjarjes, ku nga ekipi mjekësor është konstatuar vdekja e personit (femër)”.

Tutje, Ahmeti ka bërë të ditur se aktualisht policia po ndërmerr të gjitha veprimet e duhura hetimore dhe ato forenzike – të ekzaminimit, që do të ndihmonin hetimin e ngjarjes si dhe sqarimin dhe ndriçimin e plotë të rastit.

Telegrafi mëson se viktima është e moshës rreth 30-vjeçare. /Telegrafi/