E braktisi nëna, e priste për tri vite në rrugë: Historia e gruas që ia ndërroi jetën një të pastrehu (Foto)

Një nënë zemërmirë ka arritur t’ia ndërrojë qind për qind jetën një burri të pastrehë.

Ginger Sprouse kishte vërejtur se Victor Hubbard po qëndronte i ulur në të njëjtin vend të rrugës, çdo ditë, teksa ajo për tri vite po kalonte andej për të shkuar në punë, transmeton Telegrafi.

Pavarësisht motit të keq, 32-vjeçari qëndronte aty, ndërsa qindra motoçiklistë dhe këmbësorë i kalonin pranë thuajse ai nuk ekzistonte fare.

Në shumë raste ai veç vështronte përreth, e kishte raste edhe kur vallëzonte.

Një ditë, Ginger vendosi ta ndalte veturën pranë tij që ta bënte një bisedë me të e për ta kuptuar historinë e tij.

Ajo kuptoi se Victor kishte probleme psikike dhe se për shkak të kësaj nëna e kishte braktisur.

Sipas saj, atij i kishte thënë nëna që të qëndrojë në rrugë dhe ta presë, por në fakt ajo kurrë nuk u kthye për ta marrë. Victor rrinte aty duke menduar se nëna do t’i kthehej.

Ajo gjithashtu e kuptoi se ky burrë i pastrehë nuk kishte ku të flinte dhe se asnjëherë nuk ishte trajtuar tek mjeku për shkak të problemeve që kishte.

E prekur nga historia e tij, ajo nisi ta vizitojë çdo ditë në të njëjtin vend të rrugës, dhe një ditë e hapi një faqe në Facebook ku kishte shkruar historinë e Victorit. Në një postim ajo kishte thënë se autoritetet nuk kishin ndërmarrë asgjë për të, pasi Victori rrinte në rrugë dhe nuk po merrej me ndonjë aktivitet të kundërligjshëm.

“Nisa një fushatë për ta ndihmuar financiarisht, për ta dërguar tek mjeku për tu shëruar”, ka deklaruar gruaja nga Teksasi.

Ajo, përpos që arriti ta shërojë atë, i gjeti punë si kuzhinier në një shkollë.

Ai edhe sot jeton me Gingerin dhe bashkëshortin e saj.

Shumë qytetarë amerikanë e kanë përgëzuar nënën zemërmirë për faktin se ia ka ndërruar jetën për të mirë një të pastrehu. /Telegrafi/