Dy shkolla në një lokalitet pa përkujdesje institucionale

Banorët e Banullës së Lipjanit prej më shumë se një dekadë po rrezikohen nga dy objekte shkollore të cilat kanë mbetur pa përkujdesje institucionale. Ato janë demoluar, janë vjedhur dhe po paraqesin rrezik të shemben.

Arsim Jashari, shef i grupit të kuvendarëve nga radhët e PDK-së, njëherësh banor i Banullës, ka thënë se kanë reaguar edhe në të kaluarën lidhur me demolimin e këtyre objekteve, por ekzekutivi në Lipjan nuk ka marrë asnjë hap lidhur me këtë çështje.

‘’Të lihet pasuria publike në këtë gjendje në dorën e askujt, të vidhet, të demolohet kjo është e pa pranueshme nga institucionet lokale dhe kryetari Imri Ahmeti sepse tash e 12 vjet nuk ka bërë asnjë hap sa i përket preventives për kujdes të pasurisë publike. Pas luftës janë rinovuar shkolla, atëherë kjo ka qenë e kompletuar ndërkohë është mbyllur pasi janë ndërtuar shkolla siç ka ndodh edhe nëpër lokalitete të tjera. Por deri tash nuk ka pasur asnjë kujdes institucional’’, ka thënë Jashari.

Sipas tij, qytetarët kur e kanë parë se nuk po kujdeset askush atëherë e kanë demoluar dhe kanë vjedhur gjithçka që kishte brenda.

‘’Naten shfrytëzohet për dukuri negative për narkotik e të tjera. Këtu ka pasur të hapet një shkollë e mesme e investuar nga FIFA dhe UEFA, për shkollë të futbollit të mesëm dhe kanë pasur të punësohen mbi 50 punëtor dhe me një investim të lartë, por komuna e Lipjanit nuk ka pasur gatishmëri të bën marrëveshje të tilla’’, ka thënë Jashari.

Ai shpjegon se brenda fshatit Banullë është edhe shkolla tjetër, po ashtu e demoluar e cila nuk ka asnjë kujdesje nga institucionet lokale.

‘’Edhe kjo është shkolla tjetër në Banullë, edhe këtu kemi bërë kërkesa të vazhdueshme, edhe kryetari i këshillit të fshatit ka bërë kërkesë por megjithatë ka hasur në vesh të shurdhër, por ky kryetar i komunës nuk dëgjon për kujdesin e pasurisë publike, e vetmja gjë që i intereson janë tenderët me të cilët është duke u marrë, andaj kujdesi ndaj pasurisë publike është zero deri më tash, këtu shpeshherë po hyjnë fëmijët dhe nëse ndodh që mbetet një fëmijë atëherë kush do ta marrë përgjegjësinë. Kjo është e turpshme se çfarë po ndodh me taksat tona dhe me pasurinë tonë’’, ka thënë Jashati.

Në anën tjetër Komuna e Lipjanit nëpërmjet një përgjigje me shkrim ka thënë se, “Sa i përket shkollës në Banullë-Gllogovc, ju informoj se Komuna ka planifikuar të ndërtoj Çerdhe për qëndrim tërë ditor”, thuhet në përgjigje të Komunës./Telegrafi/